Prezidente Komisaun B, Deputadu José Agostinho Sequeira Somotxo.

DILI, 10 juñu 2020 (TATOLI)—Deputadu José Agustinho Siqueira “Somotxo” hosi Bankada Frente Revolusionária Timor-Leste Independente (FRETILIN), ohin, eleitu sai Prezidente Komisaun B (Negósiu, Estranjeiru, Defeza no Seguransa).

Notísia Relevante: Adérito Hugo Rezigna-Aan Hosi Prezidente Komisaun B

“Ohin, ami halo de’it prosesu votasaun ba meza komisaun B ninian, rezultadu eleisaun prezidente mak ha’u, vise-prezidente nafatin Deputadu L7 no sekretária mak Deputada Elvina Sousa,”  dehan Prezidente Komisaun B, Deputadu José Agustinho Siqueira “Somotxo”,  ba jornalista sira iha Parlamentu Nasionál, kuarta ne’e.

Nia haktuir, parte Komisaun B nian ladún iha problema no la presiza halo destituisaun tanba Prezidente sesante, Deputadu Adérito Hugo da Costa, hatama karta rezigna-aan iha semana kotuk.

Prezidente Komisaun B Foun ne’e hateten, prioridade komisaun B nian bá-oin sei halo fiskalizasaun másimu ba área defeza no seguransa.

“Ita presiza hetan referénsia hosi rai seluk hodi dezenvolve ita-nia instituisaun F-FDTL , PNTL no parte negoiu estranjeiru nian. Komisaun B ninia responsabilidade oinsá maki ta-nia seguransa ho defeza ne’e bele iha kondisaun hodi asegura ita-nia soberania no lei, orden públika nian,” nia dehan. 

Kompozisaun Meza Komisaun B mak hanesan José Agustinho Siqueira “Somoxo” hanesan prezidente komisaun, vise-prezidente komisaun mak Deputadu Cornélino Gama “L7” hosi Bankada Partidu Libertasaun Populár (PLP) no sekretária mak Deputada Elvina Sousa hosi Bankada Partidu Demokrátiku (PD).

Entretantu, kompozisaun meza komisaun anteriór kompostu hosi Prezidente Komisauun B, Deputadu Adérito Hugo da Costa hosi Bankada CNRT, Vise-Prezidente Komisaun B mak Deputadu Cornélio Gama “L7 hosi PLP (mantein) no Sekretáriu Meza Komisaun C mak Deputadu Lenadro Lobato hosi Bankada CNRT.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here