Xefe Bankada CNRT, Duarte Nunes. Imajen/Egas Cristovão

DILI, 10 maiu 2020 (TATOLI)—Xefe Bankada Congresso Nacional da Reconstrução de Timor (CNRT), Duarte Nunes, hateten defamasaun la presiza kriminaliza maibé Konsellu Imprensa (CI-sigla portugés) bele fó sansaun.

Notísia Relevante: Horta Kontra Esbosu Lei Kriminaliza Difamasaun

“Ha’u hanoin ita presiza hanoin didi’ak tanba ohin loron ita haree ezemplu sira iha Amérika nian prezidente mós ema ko’alia no laiha problema. Krítika kro’at ruma, sira iha Konsellu Imprensa mak tenke hodi fó sansaun maibé la presiza kriminaliza,” Deputadu Duarte Nunes, ko’alia iha resintu Parlamentu Nasionál, kuarta ne’e.

Se lae, nia hatutan, kriminaliza difamasaun ne’e hanesan halo konfuzaun barak tanba ida ne’e atu taka ibun ba liberdade espersaun. Hanesan, tuir nia, ema la satisfetiu liuhosi nia halo espresaun ruma hodi taka ekdas nia ibun ne’e, dalaruma Timor-Leste atu habelar tiha demokrasia maibé lori Timor-Leste ba fali “ditaadura” nian.

Xefe Bankada CNRT ne’e konsidera lei kriminaliza difamasaun la nesesáriu tanba Timor-Leste iha Konsellu Imprensa para depois haree sansaun ruma hodi eduka ema nune’e neineik ema-hotu hatene linguajen ne’e ladi’ak.

“Maibé ita kriminaliza ne’e diretamente ita hatama ema-ne’e ba kadeia, dalaruma intensaun atu ba forma ditadura, tuir ha’u-nia hanoin ita direta kriminaliza ne’e ladi’ak,” nia dehan.

Nia afirma, ema-nia Liberdade expresaun garante ona tuir prinsípiu konstitusionál, ba ema sira-ne’ebé hasai liafuan ladi’ak ne’e Konsellu Imprensa mak iha responsabilidade tau-matan hodi kontrola.

Nia hateten, kódigu sívil fó dalan hela bainhira ema ruma sente la satisfetiu ho opiniaun ruma, tanba ne’e la presiza altera hodi kriminaliza difamasaun.

“Bele ba aprezenta keixa no haruka ema-ne’e multa, kriminaliza ne’e ba ha’u seidauk iha tempu tanba ita iha faze ita hahú demokrasia. Ladi’ak mak liafuan tarata ema ne’e, maibé dalaruma la’ós ho krime. Tanba ita “vinga” ema, ita hatama direamente ba kadeia. Depois, ohin-loron, polítika mós tama iha justisa, dalaruma ema balun sei vitíma hela de’it. Ida-ne’e laiha balansu ba situasaun ne’e. Ha’u hanoin ita presiza halo edukasaun neineik,” nia dehan.

Tuir nia, dekretu ne’e uluk parlamentu mak delega Governu halo, tanba ne’e kna’ar parlamentu nian.

“Tuir loloos ne’e alterasaun sira-ne’ebé ke afeta ema-barak nia moris ne’e di’akliu lori mai parlamentu para ita deskuti didi’ak, ta’es didi’ak. Depois nia benefísiu iha ne’ebé, vantajen iha ne’ebé ho kontextu ita harii estadu demoktrátiku,” Xefe Bankada CNRT ne’e fó hanoin.

Notísia Relevante: Esbosu Lei Kriminaliza Difamasaun Labele “Viola” Prinsípiu Konstitusionál

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here