Logotipu Tribunál Distritál. Imajen/Egas Cristóvão

DILI, 10 juñu 2020 (TATOLI) – Liuhusi primeira audiénsia julgamentu, ohin, Tribunál Distritál Dili (TDD) aplika prizaun preventiva ba arguidu SG no aplika medida aprezentasaun periódiku ba arguidu NP, LC, SS ne’ebé involve iha kazu omisídiu atentadu agravadu iha area Metiaut, Dili foin lalais ne’e.

Tuir faktu ne’ebé arrola husi Ministériu Públiku, iha loron 8 juñu 2020, arguidu sira hala’o hela jogu desportivu (joga bola) iha area tasi-ibun Metiaut, Dili. Nune’e, lezadu ho inisiál Z ho nia maluk ba ‘sadik’ malu ho arguidu sira.

Mezmu nune’e lakleur dame malu tiha, maibé iha oras balun nia-laran lezadu Z la satisfás nune’e hodi ba provoka arguidu sira no lezadu Z lansa tuku iha arguidu SG nia hirus-matan, ho nervozu arguidu SG duni tuir lori ho ai responde kedas ho asaun baku lezadu Z ne’ebé rezulta kanek.

Ho aktu ne’e, Ministériu Públiku liuhusi Prokuradora Ivonia Guterres, promove arguidu ho krime omisídiu atentadu agravadu ne’ebé previstu iha artigu 139 kódigu penal Timor-Leste.

Juiza singular, Julmira Auxiladora aplika prizaun preventiva ba arguidu SG tanba arguidu mós antes ne’e komete ona kazu-tolu (3) seluk ne’ebé daudaun rejista hela iha TDD seidauk halo julgamentu.

Defeza Marino da Crus de Jesus, ne’ebé fó asisténsia legal ba arguidu sira hateten, Tribunál aplika prizaun preventiva ba SG hodi bele asegura no labele dezvia husi justisa ba aktu ne’ebé komete.

“Sira na’in-tolu aplika aprezentasaun periódika fulan-ida, dala-rua ba sentru polísia ne’ebé besik,” hateten Advogadu Privadu Marino da Crus de Jesus.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here