Xefe Gabinete Prezidente Autoridade Rejiaun Administrativa Espesiál Oé-Cusse Ambenu (RAEOA), Silvério Pinto Baptista, Imajen Tatoli/Egas Cristovão

DILI, 10 juñu 2020 (TATOLI)–Autoridade Rejiaun Administrativa Espesiál Oé-Cusse Ambenu (RAEOA), sei halo pagamentu ba subsídiu $200, iha fulan Juñu nia klaran tanba ekipa ne’ebé oras ne’e halo pagamentu iha munisípiu 12, balun mak sei dezloka hodi halo pagamentu iha Oé-Cusse bainhira pagamentu iha munisipiu 12 ramata.

Notísia Relevante: Iha Tempu Badak, Autoridade RAEOA Sei Asina MoU ho ADTL

Xefe Gabinete Prezidente Autoridade RAEOA, Silvério Pinto Baptista, hateten prosesu pagamentu ba RAEOA bele akontese iha loron 20 ba leten, tanba ekipa pagamentu oras ne’e dezloka hodi halo pagamentu iha munisípiu 12.

“Prosesu pagamentu ba RAEOA bele akontese iha fulan juñu nia klaran ho data maka loron 20 ba leten, tanba ekipa ne’ebé oras ne’e dezloka hodi halo pagamentu iha munisípiu 12, sira balun mak sei dezloka ba iha RAEOA atu halo pagamentu iha ne’ebá,” dehan Xefe Gabinete Prezidente Autoridade RAEOA, Silvério Pinto Baptista, ba Ajénsia TATOLI iha edifísiu gabinete RAEOA Faról, Dili, segunda ne’e. 

Nia dehan, tuir kalkulasaun, pagamentu iha RAEOA sei presiza tempu entre loron 10 de’it tanba númeru benefisiáriu iha família 20.000 resin, ne’e númeru ne’ebé kiik. Maski iha despaixu ba pagamentu ne’e sei hala’o entre loron 10 to’o loron 14 fulan ne’e.

Xefe gabinete ne’e esplika, antes ne’e autoridade ne’ebé reprezenta hosi xefi gabinete rasik  realiza ona koordenasaun liuhosi enkontru ne’ebé hala’o iha Ministériu Administrasaun Estatál (MAE) ho nia reprezentante maka diretór jerál, parte Ministériu Solideriedade Sosiál no Inkluzaun (MSSI) reprezenta hosi Diretór Jerál Rui Manuél Gago Exposto, inklui Diretora Programa Nasionál Dezenvolvimentu Suku (PNDS), Dulce Guterres Junior,  hodi diskute kona-ba prosesu transferénsia subsídiu ba benefisiáriu sira iha RAEOA.

Nia dehan, tuir informasaun hsi diretór jerál MSSI katak osan ne’e alokadu ona no RAEOA mak tenke prepara buat rua, ida maka perpara númeru konta bankária hosi Banco Nacionál Comércio Timor-Leste (BNCTL, no mós prepara brankas.

“Parte RAEOA rasik, ita foin atu loke númeru konta bankária, tanba suku 18 iha RAEOA-ZEESM, iha autoridade anteriór, seidauk iha númeru konta bankária,” nia esplika.

Nune’e, Silvério hatutan, Prezidente Autoridade hasai ona deaspaixu ida ba diretora finansas RAEOA atu fasilita prosesu loke númeru konta bankária ne’e no prosesu ne’e kontinua la’o.

“Maibé, enkontru ne’ebé hala’o iha loron 8 fulan ne’e, diretór jerál MAE hateten maski ida-ne’e atu loke fali mós, ita presiza tempu fulan rua. Tanba númeru konta bankária ne’ebé suku sira oras ne’e iha prosesu atu loke ne’e,  tenke rejistu mós iha Ministériu Finansas,” nia hateten. 

Ho ida-ne’e mak, nia esplika, iha konkordánsia ida katak Autoridade sei haruka karta ida ba Ministru Administrasaun Estatál atu husu autorizasaun, nune’e autoridade bele uza de’it númeru konta bankária hosi PNDS nian, ne’ebé antes nee kada suku iha RAEOA iha ona.

“Ida ne’e atu bele iha efisiénsia tempu, ita sei uza de’it númeru konta bankária PNDS ninian no mós uza brankas ne’ebé PNDS  iha kada suku. Parte autoridade konkorda ona no ohin duni karta ne’ebé asinadu hosi Prezidente Autoridade rasik, sei entrega ba MAE hodi husu autorizasaun. Karta ne’e rasik, Ministru sei enkamiña fali ba iha MSSI, tanba karta ne’e rasik kopia ba MSSI no MF hanesan koñesimentu atu ita bele uza duni konta bankária husi PNDS,” nia dehan.

Nia haktuir, Diretór Jerál sira mós hateten ida-ne’e mak alternativa di’ak liu, tanba iha munisípiu sira seluk mós, sira barak liu empresta hotu númeru konta bankária PNDS nian, ne’ebé oras ne’e instaladu iha suku hotu iha territóriu tomak.

Xefe Gabinete ne’e, fó hanoin katak rejistu ba konta bankária foun ba suku sira ne’e, autoridade sei loke nafatin atu bele uza iha futuru iha suku ida-idak nian.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here