Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Osória Marques.

DILI, 10 juñu 2020 (TATOLI)–Diretór Jerál Ministériu Solidaridade Sosiál no Inkluzaun, Rui Manuel Gago Exposto, husu ba autoridade lokál sira tenke halo servisu ho transparánsia iha prosesu pagamentu subsídiu $200 ba benefisiáriu sira iha territóriu Timor-Leste.

Notísia Relevante: Benefisiáriu Saláriu $500 Bele Simu Subsídiu $200

Nia hatutan, osan subsídiu $200 ba benefisiáriu sira ne’e, direitu ema ida-nian atu hetan maibé husu ba autoridade lokál sira atu labele kua osan ne’e. Tanba, Governu liuhosi MSSI la autoriza atu kua osan. 

“Ha’u husu tan dala ida ba komunidade sira katak iha prosesu pagamentu subsídiu $200 ida-ne’e, ita hetan observasaun direta hosi ita-nia parseiru dezenvolvimentu sira iha Nasionál no Internasionál sira. Di’ak liu buat ne’ebé mak ita bele hala’o bá maibé tenke ho transparánsia labele halo oin-oin depois ema dahan ita halo servisu la ho onestu. Autoridade lokal labele kua ema-nia osan ne’e,” dehan Rui Manuel Gago Exposto ba jornalista sira, hafoin atualiza pagamentu ba loron dahuluk nian iha salaun MSSI, Caicoli, kinta ne’e. 

Diretór ne’e hateten, MSSI ho nia komitmentu ida katak benefisiáriu sira-nia osan subsídiu ne’e $200 bainbira kua entaun autoridade mak hatene.

“MSSI nafatin ho nia komitmentu katak osan $200 ne’e ba benefisiária sira ho kompletu. Maibé, bainhira kua, ida-ne’e ami fase liman no ami lahatene buat ida. Ami hatene mak osan $200 ba benefisiária sira iha situasaun Estadu Emerjénsia ba COVID-19 nian ne’ebé afeta ba Timor-Leste ne’e ho $200,” nia hateten. 

Tanba, nia informa, iha prosesu pagamentu ne’e inklui ho parte hotu hanesan Provedória Direitus Humanu no Justisa (PDHJ, sigla portugés), CAC no mós ho sosiedade sivíl relevante. Nune’e, bainhira sira aplika maka instituisaun hirak ne’e bele observa direta.

“Bainhira autoridade ida mak halo hanesan ne’e, ha’u hanoin PDHJ no CAC inklui ho sosiedade sivíl sira mós iha fatin pagamentu. Sira bele halo observasaun ba pagamentu iha suku no aldeia iha munisípiu hotu iha Timor-Leste eseptu Rejiaun Administrativau Espesiál Oé-Cusse Ambeno (RAEOA) mak seidauk. Autoridade lokál mak kua benefisiária sira-nia osan mak nia sei ba hatán rasik,” nia esplika.

Jornalista : Osória Marques

Editór       : Cancio Ximenes 

HAKEREK NO HATÁN

Please enter your comment!
Please enter your name here