Koordenadór Jerál Sekretariadu Konsellu Jestaun Fundu COVID-19 no atuál Diretór Jerál Orsamentu Estadu Ministériu Finansa, Januário da Gama. Imajen Tatoli/Egas Cristovão

DILI, 10 juñu (TATOLI) – Ministériu Finansa (MF) liuhosi Konsellu Jestaun Fundu COVID-19 konklui ona transferénsia pagamentu suplementu remuneratóriu ba Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ne’ebé mak durante ne’e hala’o kna’ar iha ámbitu Estadu Emerjénsia ligadu ho prevensaun surtu COVID-19 iha Timor-Leste.

“Konsellu Jestaun Fundu COVID-19 konklui ona transferénsia pagamentu subsídiu ba PNTL no F-FDTL iha horiseik (tersa), espera ohin ka aban simu ona sira nia subsídiu,” relata Koordenadór Sekretariadu Konsellu Jestaun Fundu COVID-19, Januário da Gama ba Agência Tatoli iha ninia kna’ar fatin, Ministériu Finansa, Aitarak-Laran, kuarta ne’e.

Atuál Diretór Jerál Planeamentu no Orsamentu MF ne’e informa, proposta ne’ebé PNTL aprezenta ho totál benefisiáriu hamutuk na’in-4.063, ho ninia totál orsamentu ne’ebé aloka ba pagamentu benefisiáriu sira ne’e hamutuk millaun $3,6 ba fulan-rua nian, no husi totál ne’e na’in-47 mak integra iha Sala SItuasaun Sentru Integradu Jestaun Krize (CIGC, sigla portugés).

“Portantu iha na’in-4.016 mak prosesa ona pagamentu maibé iha mós lista adisionál balun, ne’ebé pesoál balun ne’ebé latama ona servisu, moras no la ativu ona, entaun 400-resin maka hetan redusaun,” nia akresenta.

Enkuantu proposta husi F-FDTL aloka orsamentu hamutuk millaun $1,8 ba pagamentu benefisiáriu hamutuk na’in-2.070 ba fulan-rua nian, no husi totál ne’e na’in-64 integra iha Sala Situasaun CIGC, ne’ebé hela de’it na’in-2.006.

Suplementu remuneratóriu bazeia ba rezolusaun ne’ebé aprovadu iha Konsellu Ministru estraordinária iha loron 5 maiu, ne’ebé sei oferese ba profesionál sira ne’ebé durante ne’e dedika sira nia-an hodi halo prevensaun ligadu ho surtu COVID-19 iha Timor-Leste no profisionál hirak ne’e konsidera hanesan liña frente.

Montante ne’ebé prevee iha rezolusaun ne’e husi Ministériu Saúde (MS) fahe ba kategoria tolu no iha rezolusaun ne’e valór ne’ebé aplika ba profesionál sira ne’ebé konsidera hanesan liña frente no nia pagamentu sei sura kada loron.

Montante $25 ba kategoria dahuluk, ba sira ne’ebé servisu iha fatin izolamentu no laboratóriu, $20 ba sira ne’ebé servisu iha kuarentena no mós $15 ba sira ne’ebé serbisu administrativu ka sira ne’ebé apoiu maibé laiha kontaktu direta.

Ba motorista, forsa, defeza, imigrasaun, kuarentena, alfándega, no sira ne’ebé servisu iha fronteira, aeroportu, portu no terrestre kada loron $15.

Enkuantu ba pesoál água no saneamentu, elétrisidade, limpeza, seguransa sivíl, no pesoál sira rekolla lixu kada loron $5.

Jornalista: Antónia Gusmão

Editora: Julia Chatarina

3 KOMENTÁRIU

  1. Sistema failha…adia ba adia ate bainhr los…??
    Se dia 15-06-20 mak la simu nafatin…!! Saida maka failha tan fali ona…

  2. Funcionario Imigrasaun lahetan Subsidiu Remonitoriu ba Covid 19, So PNTL nb destaka iha Imigrasaun mk hetan Subsidiu refere! Tmba Superior Maximu iha Diresaun Refere Laiha Responsablidade, Hanoin deit Nia An.

HAKEREK NO HATÁN

Please enter your comment!
Please enter your name here