Xefe Suku Becora, António da Silva Guterres. Imajen Tatoli/Osória Marques.

DILI, 09 juñu 2020 (TATOLI)–Xefe Suku Becora, Postu Administrativu Cristu Rei, Munisípiu Dili, António da Silva Guterres, hateten nia iha inisiativa atu halo pagamentu ba família uma-kain 205 iha Aldeia Darlau tanba distánsia dook hosi Suku Becora.

Notísia Relevante: Benefisiáriu Saláriu $500 Bele Simu Subsídiu $200

“Ha’u hakarak no ha’u iha inisiativa rasik atu halo pagamentu ba ita-nia xefe família 205 ne’ebé mak hela iha Aldeia Darlau tanba sira hela dook hosi sidade ho kilometru 21. Tanba ne’e, bainhira pagamentu iha suku ramata, ha’u sei lori osan ba iha Darlau. Ha’u tenke ba tanba sira mak ha’u sai Xefe Suku Becora,” dehan Xefe Suku Becora, António da Silva Guterres, ba jornalista sira iha Sede Suku Becora, tersa ne’e.

Nia informa, atividade pagamentu subsidiu $200 ba benefisiáriu sira hahú iha otuku 08:00 dadeer maibé mosu problema hosi komunidade rasik, nune’e to’o lorokraik 15:20 maibé foin mak bolu xefe família na’in 30-resin.

“Foin mak hala’o pagamentu ba Aldeia Becusse Sentru maibé ita rejista ona reklamasaun na’in 20-resin ona. Tanba mosu difikuldade ida iha Sede Suku Becora ne’ebé fó impaktu ba ami no hodi kleur. Tanba ita-nia komunidade balun naran iha fixa família tau mane (laen) nia naran maibé iha fali lista atu simu osan nian feto (fen) nia naran mak iha fali entaun ita tenke halo reklamasaun,” xefe suku ne’e hatete.

Iha Suku Becora, nia haktuir, nia submete totál dadus subsídiu uma-kain ba Ministériu Administrasaun Estatal (MAE) hamutuk 4.380 maibé hosi dadus editadu ne’e Governu fó rezultadu mak hamutyuk 4.353.

“Ha’u haruka naran xefe família ba subsídiu $200 ba Governu hamutuk 4.380 maibé ita-nia Governu haruka fila benefisiáriu sira hamutuk 4.353 no Governu elimina tiha 27 xefe família. Ho ida ne’e ha’u aviza katak sira katak ita sei halo reklamasaun ba Governu no depois loron 15 Governu sei halo pagamentu ba família hirak ne’ebé tama ba lista reklamasaun,” nia dehan.

Entretantu, benefisiária Elda Maria Guterres hateten iha situasaun difisil nia laran hanesan Estadu Emerjénsia ba COVID-19, Governu hakarak ajuda subsídiu ba nia komunidade ne’e hanesan onra no orgullu boot ida.

“Ha’u orgullu tebes ba ajuda hosi ita-nia Governu tanba iha situasaun difisil ida-ne’e, Governu hakarak duni ajuda nia povu relasiona ho ekonómia ne’ebé mak tún tebes,” nia dehan.

Notísia Relevante: Benefisiáriu Saláriu $501 Mak Simu Subsídiu Sei Hasoru Lei

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here