Sekretáriu Estadu Formasaun Profisionál no Empregu, Julião da Silva. Imajen Tatoli/Egas Cristovão.

DILI, 09 juñu 2020 (TATOLI) – Traballadór timor-oan iha Austrália no Korea Súl hamutuk na’in-90 sei fila hikas mai Timor-Leste tanba kontratu ramata ona no daudaun uza de’it viza protesaun.

Tuir dadus ne’ebé fó sai husi Sekretáriu Estadu ba Formasaun Profisionál no Empregu, Julião da Silva, katak traballadór timor-oan iha Austrália hamutuk na’in-30, maibé iha traballadór feto na’in-haat maka grávida no traballadór iha Korea Súl hamutuk na’in-60.

Relasiona ho asuntu ne’e, Sekretáriu Estadu Julião hasoru malu ho Primeiru-Ministru (PM), Taur Matan Ruak hodi relata no buka solusaun ba asuntu refere no Xefe Governu orienta buka meiu hodi lori hikas traballadór sira ne’e mai Timor-Leste.

“Ha’u hasoru Primeiru-Ministru hodi atualiza situasaun kona-ba ita-nia sidadaun timor-oan ne’ebé ninia kontratu servisu ramata ona iha Korea no Austrália, tanba balun aplika fali viza protesaun, signifika bele sai traballadór ilegál iha Austrália no balun grávida ona tenke fila,” dehan governante ne’e iha Palásiu Governu, hafoin hasoru malu ho PM Taur, tersa ne’e.

Tuir Julião, ba sira ne’ebé iha Austrália fásil tebes atu transporta sira fila tanba daudaun ne’e iha Airnorth, maibé traballadór iha Korea mak sei buka dalan.

“Kona-ba traballadór iha Korea Súl, Governu sei komunika ho Governu Indonézia atu autoriza aviaun halo tránzitu bainhira transporta sidadaun sira mai Timor-leste. Tanba timor-oan hirak ne’e maihusi nasaun afetadu COVID-19 entaun Sekretaria Estadu ba Formasaun Profisionál no Empregu (SEPFOPE) sei koordena ho ekipa Sentru Integradu Jestaun Krize (CIGC, sigla portugés) hodi prepara fatin kuarentena ba sira,” nia akresenta.

Nune’e, PM Taur orienta sidadaun sira mai sedu di’ak liu, tanba ne’e iha posibilidade semana ne’e sira bele fila ona.

Kona-ba orsamentu atu transporta timor-oan hirak ne’e, Julião dehan traballadór sira disponível atu selu rasik, maibé importante iha voo hodi sira bele to’o mai Timor-Leste.

“Tuir informasaun ne’ebé mak ami rona husi traballadór sira katak sira prontu atu kontribui, importante mak iha aviaun no sira prontu selu rasik. Ha’u ko’alia ona ho Primeiru-Ministru rasik katak Governu mós tenke ajuda hodi halo kama’an sira nia viajen,” nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here