Ai-han iha Mercado Taibesse. Imajen Tatoli/Egas Cristovão

DILI, 09 juñu 2020 (TATOLI) – Ministru Agrikultura no Peska, Pedro Reis, akompaña ho parseiru dezenvolvimentu sira halo lansamentu Relatóriu Avaliasaun Rápida ba Seguransa Ai-han 2020 iha Timor-Leste.

Husi rezultadu levantamentu dadus iha suku 82 husi suku 452 iha territóriu, hatudu katak uma-kain 779 afetadu ba seguransa ai-han no frajilidade eziste ona iha Timor-Leste, tanba uma-kain barak hatudu menus ai-han no poupansa, inklui enfrenta difikuldade hodi rekopera tanba kauza husi COVID-19 no dizastre naturál.

Xefe Departementu Seguransa Ai-han no Informasaun MAP, Rofino Soares Gusmão, relata katak peskiza dadus hodi elabora relatóriu ne’e realiza husi tékniku Ministériu Agrikultura no Peska (MAP) iha fulan-maiu 2020, ne’ebé relata uma-kain 799 maka afeta ba seguransa ai-han.

“Objetivu husi relatóriu ne’e atu fó hanoin katak durante ameasa sira ne’ebé iha, ita haree ba uma-kain ne’ebé maka hetan impaktu. Uma-kain 779 maka iha ai-han atu responde de’it ba fulan-rua oin mai, signifika katak ai-han sira ne’ebé maka sira rai labele responde ba tinan ida tomak tanba ita ko’alia kona-ba asuntu seguransa ai-han,” dehan Rofino Soares iha Suai Room Timor Plaza, tersa ne’e.

Ministru Agrikultura Peskas, Pedro Reis, apresia ba parseiru dezenvolvimentu sira tanba fó ona apoiu fundu hodi realiza levantamentu dadus.

Atividade ne’e nu’udar kolaborasaun entre MAP no Ministériu Finansa no ajuda husi parseiru sira hanesan Mercy Corps, Oxfam, CRS, ADRA, World Vision no Tomak Market Developmet  facility.

Enkuantu orsamentu ba levantamentu dadus ne’e maihusi Governu Estadu Unidu Amérika no Austrália.

“Ha’u hato’o apresiasaun ba apoiu hotu relasiona ho levantamentu ne’e. Ha’u hein katak koopersaun no kolaborasaun sira ne’e bele kontinua iha futuru,” dehan governante ne’e.

Nune’e mós, nia agradese ba eis Ministru Agrikultura no Peska, Joaquim José Gusmão dos Reis Martins, ne’ebé orienta ona tékniku MAP atu hala’o atividade ne’e.

Ministru ne’e nota katak, iha tinan 18 ona Timor-Leste restaura independénnsia, maibé seguransa  ai-han sempre sai problema tanba produsaun ai-han sei menus hodi kobre uma-kain.

Tuir nia, esforsu lubuk ida mak Governu, parseiru dezenvolvimentu, sosiedade sivíl no setór privadu halo ona maibé to’o agora problema seguransa ai-han kontinua sai preokupasaun boot iha Timor-Leste tanba produsaun agríkola sei menus hodi kobre nesesidade uma-kain nian.

“Ita-nia sistema ai-han ladún reziliente, bainhira mosu soke ruma hanesan pesti African Swine Fever, mudansa klimátika no pandemia COVID-19 halo populasaun barak mak enfrenta hamalaha,” nia akresenta.

Relatóriu ne’e mós sita katak uma-kain barak maka iha esperiénsia inseguransa ai-han ho tipu ne’ebé maka tuir loloos iha ai-han sufisiente, maibé tanba impaktu husi surtu COVID-19.

“Barak menus ai-han no labele dura to’o fulan-rua ka tolu. Maski nune’e problema ai-han la’ós universál, katak uma-kain balun kontinua iha ai-han maski uma-kain balun ne’ebé maka afetadu difísil tebes atu rekopera relasiona ho COVID-19,” nia tenik.

Tuir governante ne’e, relatóriu ne’e sita katak kuaze partisipante hotu sensibilizadu atu halo prevensaun, signifika informasaun ne’ebé maka fahe husi ekipa Sentru Integradu Jestaun Krize (CIGC, sigla portugés) to’o duni iha área remota.

“Presiza rejista katak levantamentu rápidu ne’e halo de’it iha suku 82 husi suku 452 iha territóriu laran tomak, ho nune’e ita presiza aprosima levantamentu dadus ne’e ho kuidadu no labele jeneraliza, tanba iha parte balun ita foin mak koilleta no balun ita kuda fali epoka daruak nian, hein katak rezultadu husi aktividade hirak ne’e bele responde ba ezijensia uma-kain nian iha fulan hirak tuir mai,” nia subliña.

Sorin seluk, Embaixadór Austrália ba Timor-Leste, Peter Robert kongratula Governu Timor-Leste liuhusi MAP tanba bele halo peskiza ne’ebé di’ak tebes atu hatene populasaun hira maka enfrenta insegurasa ai-han relasiona ho situasaun pandemia globál, dezastre naturál no kestaun seluk tan.

“Ha’u hakarak hato’o apresiasaun ba Ministru  Agrikultura no Peska tanba bele halo levantamentu rápida ba seguransa ai-han hodi populasaun sira bele komprende di’ak liután impaktu husi COVID-19 no ataka ne’ebé maka foin daudaun akontese iha setór agrikultura  ne’ebé afeta ba povu Timor-Leste,” nia dehan.

Nia orgullu bele fó ona apoiu ba atividade ne’e, liuhosi Oxfam ne’ebé hanesan parte ida husi programa kooperasaun husi Organizasaun Naun Govermentál (ONG) Austrália no mós liuhosi envolvimentu Austrália nia programa agríkola prinsipál iha Timor-Leste maka hanesan to’os ba moris di’ak, ne’ebé koñesidu liu ho naran Tomak Mercy Corp, ne’ebé hanesan parseiru implementadór.

Nia rekoñese, Austrália no Timor-Leste iha istória naruk husi servisu hamutuk hosi dezenvolve agríkola no hanesan doadór ne’ebé maka bo’ot liu iha setór agrikultura importante tebes atu asegura seguransa ai-han no sai mós hanesan fonte prinsipál ida hodi sustenta timor-oan barak  nia moris.

“Ami iha kompromisu atu servisu hamutuk ho Timor-Leste hodi responde ba rekopera impaktu COVID-19. Ami fó asisténsia adisionál liuhosi Tomak Market Developmet  facility no ami-nia programa kooperasaun ho ONG Austrália nian hodi hasa’e produsaun ai-han inklui apoiu seguransa ai-han no apoiu povu ne’ebé defende agrikultór hodi sustenta sira-nia moris,” nia subliña.

Nia iha esperansa atu rona tan rezultadu levantamentu rápida ba seguransa ai-han no kontinua servisu hamutuk ho MAP hodi jere impaktu husi COVID-19.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here