DILI, 09 juñu 2020 (TATOLI)-Profesór hamutuk 3.000 resin maka partisipa ona formasaun via online kona-ba meiu prevensaun ba transmisaun surtu coronavirus iha Timor-Leste.

Prezidente Interinu Institutu Nasionál Formasaun Dosente no Profisioná (INFORDEPE), Arlindo Pinto, hateten husi total profesór 15.000 destakadu iha territóriu, rihun 3-resin maka partisipa ona formasaun via online ne’ebé oferese husi INFORDEPE.

Programa formasaun ne’e realiza ona iha loron 6 no sei ramata iha 19 fulan-juñu ho objetivu atu hasa’e abilidade profesór sira nian ba prevene no kombate COVID-19.

“Ami uza sistema formasaun online ba Profesores sira liu husi apoiu operadór Timor Telekom, Telekomcel no Telemor, ami fahe materia COVID-19 nian ho pergunta inklui kuis balun ba sira hodi prienxe depois sira sei hatama fali hodi hetan valór,” katak nia ba Jornalista sira iha Salaun MEJD Vila-Verde, ohin.

Iha pergunta 10 maka INFORDEPE dezenvolve hodi fó ba profesór sira para prienxe, bainhira profesór sira prienxe ho loos hotu sei hetan valór 70 no pasa iha formasaun ne’e.

Iha biban hanesan Ministra Edukasaun Juventude no Desportu, Dulce de Jesus Soares, agradese ba INFORDEPE tanba kontribui hodi fó ona formasaun ba profesór sira.

“Programa ne’e foin mak realiza loron tolu de’it, dadus hatudu ona kuaze profesór sira 3.000 resin mak hetan ona formasaun no sira ne’e kategoria pasa hotu. Konserteza sira komprende tebes padraun minimu ne’ebé Ministériu prodús no sei implemnta iha eskola sira,”dehan Dulce.

Jornalista : Tomé Amado

  Editór     : Agapito dos Santos

HAKEREK NO HATÁN

Please enter your comment!
Please enter your name here