DILI, 08 juñu 2020 (TATOLI)—Parlamentu Nasionál (PN) hein proposta foun hosi Ministériu Finansa (MF) kona-ba atu halo reforma ba sistema orsamentu no jestaun finanseira.
Notísia Relevante: Parlamentu Nasionál Aprova Konta Jerál Estadu 2018
Prezidente Parlamentu Nasionál, Deputadu Aniceto Longuinhos Guterres Lopez, espera Governu bele asume responsabilidade hodi halo reforma ba sistema orsamentu no jestaun orsamentu.
“Governu halo kompromisu atu asume responsabilidade hodi rezolve mós frajilidade sira-ne’ebé iha no atu halo reforma ba sistema orsamentu no jestaun finanseira. Agora sira sei prepara lei foun sei lori mai iha parlamentu. Ami hein,” Deputadu Aniceto Longuinhos Guterres Lopez, ko’alia asuntu ne’e bainhira Ministériu Finansa responde rekomendasaun hosi Kámara Kontas Tribunál Superiór Administrativu, Fiskál no Kontas (LOCdC-sigla portugés), iha plenária Parlamentu Nasionál, segunda ne’e.
Deputadu Aniceto Guterres espera governu liuhosi Ministériu Finansa bele kumpre promesa hodi asume responsabilidade.
“Parlamentu Nasionál aguarda proposta de lei foun kona-ba lei orsamentu no jestaun finanseira ne’ebé ita boot sira promete katak atu lori mai (PN), ita sei halo diskusaun no aprofunda didi’ak hodi bele gaña sistema jestaun finanseira ida di’ak no apropriadu ba ita-nia estadu,” nia dehan.
Entretantu, Vise-Ministra Finansa, Sara Lobo Brites, informa ba deputadu sira katak daudaun ne’e prepara hela proposta lei foun kona-ba enkuadramentu estrutura Orsamentu Jerál Estadu (OJE).
“Governu mós iha hela faze preparasaun atu aprezenta proposta lei foun kona-ba enkuadramentu Lei Orsamentu no Jestaun Finanseira ne’ebé ankuadra estrutura Orsamentu Jerál Estadu ho klasifikasaun sira-ne’ebé mak hanesan rekomendasaun hato’o, konsentimente konserteza Konta Jerál Estadu mós sei refleta estrutura refere,” Vise-Ministra esplika liuhosi plenária.
Nia fó ezemplu, instituisaun Autoridade Nasionál Petróleu no Minerál (ANPM) no Rejiaun Administrativa Espesiál Oé-Cusse-Ambeno (RAEOA) durante ne’e estrutura orsamentu tau prevee instituisaun rua iha rúbrika transferénsia públika no relatóriu mós liña ida de’it kona-ba ezekusaun tranferénsia públika iha instituisaun sira-ne’e.
Tanba ne’e mak Ministériu Finansa haree karik ezijénsia ne’ebé mak hato’o iha rekomendasaun sira-ne’e atu diskrimina ninia despeza ne’e detalla maka iha preparasaun orsamentu mós tenke refleta kedas estrutura refere ho nune’e aprezentasaun kontas bele aprezenta relatóriu ne’ebé mak hanesan.
“Gradualmente ami la promete maibé instituisaun balu ami bele konsolida hamutuk iha Konta Jerál Estadu 2019. Ami fiar katak ho lei foun enkuadramentu ba orsamentu no jestaun ami sei halo estrutura halo didi’ak fali klasifikasaun sira-ne’e,” Sara Lobo Brites hateten.
Jornalista : Evaristo Soares Martins
Editór : Cancio Ximenes
