Koordenadora UPMA, Brígida Soares. Imajen Tatoli/António Gonçalves

DILI, 09 juñu 2020 (TATOLI) – Ekipa Unidade Planeamentu, Monitorizasaun Avaliasaun (UPMA) hahú preparasaun programa prioridade ba implementasaun Orsamentu Jeral Estadu (OJE) 2020 tuir planu Governu, tanba ne’e UPMA identifika ona prioridade tolu.

Koordenadora UPMA, Brígida Soares, informa programa hotu tenke bazeia ba prioridade ne’ebé maka Governu trasa ona no agora daudaun prioridade ne’ebé iha ona planu sei mantein.

“Programa dahuluk maka reforma ne’ebé la’o daudaun hanesan reforma administrasaun públika, reforma judisiáriu, reforma ekonomia, reforma fiskál no mós reforma jestaun finansa públika, Programa daruak maka produtividade ekonomia kompostu hosi produtividade públika no privada no programa tolu mak reziliénsia hanesan sobre vivu iha relasaun ho impaktu COVID-19 hanesan iha seguransa alimentár, sistema saúde, no mós sistema edukasaun, tanba iha situasaun ne’e estudante sira labele ativu iha prosesu aprendizajen,” esplika Koordenadora Koordenadora ne’e ba Agência Tatoli iha nia kna’ar fatin, Palásiu Governu, tersa ne’e.

Nia dehan, tinan ne’e falta de’it fulan-neen, tanba ne’e foin daudaun Ministériu Finansa (MF) konvoka reuniaun ho kada entidade governamentál sira iha liña ministériu, ajénsia autónomu no instituisaun sira ne’ebé sei elabora orsamentu, atu komunika hodi haree orsamentu ba kada kategoria ne’ebé daudaun sei bele utiliza, bele informa ba MF.

Tuir Brígida Soares, orientasaun husi Primeiru-Ministru, Taur Matan Ruak ne’ebé fó ba UPMA katak iha mudansa oituan ne’ebé presiza adapta ho planu ba rekuperasaun ekonomia ne’ebé lidera husi Rui Gomes ho mandadu to’o iha 2023.

Relasiona ho programa prioridade, iha tempu badak UPMA sei konvida kada entidade governamentál hodi partisipa iha reuniaun téknika ida. 

“Iha reuniaun ne’e UPMA sei fó asisténsia téknika oinsá atu diriji entidade governamentál sira hodi foku ba sira-nia programa iha 2020 no foku liu ba programa tolu ne’ebé mak tau prioridade,” nia akresenta.

Liga mós ba iha rekuperasaun ekonomia ho programa prioridade ne’ebé mak Governu plenea, Brígida esklarese, programa sira ne’e sei mantein hodi realiza rekuperasaun ekonomia, tanba programa sira ne’e liga ona ho Planu Estratejiku Dezenvolvimentu Nasionál (PEDN) inklui Objetivu Dezenvolvimentu Sustentável (ODS) no importante liu maka liga ho programa Governu. 

Relasiona ho programa prioridade sira ne’e tuir Koordenadora UPMA ne’e katak sei laiha implikasaun boot ba iha planu ministériu sira nian ne’ebé antes ne’e iha ona. 

“Ha’u hanoin laiha implikasaun boot tanba pograma sira ne’e mantein ka ninia duransaun ne’e tempu naruk la’ós tempu badak no ninia mudansa dalaruma akontese iha nível sub-programa no nível atividade tanba dalaruma atividade sira karik iha meiu foun ne’ebé maka hakarak atu introdúz,” nia akresenta. 

Programa no sub-programa agora daudaun iha hela prosesu revista tanba iha programa hamutuk 137 ne’ebé mak UPMA propoin ba Parlamentu Nasionál iha 2016, inklui ona pakote 2020 nian, maibé xumba.

“Entaun atu define tenke halo revista filafali atu haree katak programa hira mak tenke sai foku,” nia salienta.

Aleinde ne’e, UPMA mós envolve iha ekipa rekuperasaun ekonomia iha rai-laran ligadu ho surtu COVID-19 iha Timor-Leste. 

“Ami foku ba planeamentu, monitorizasaun no avaliasaun, iha planeamentu, signifika katak halo koordenasaun atu asegura liña ministériu sira hodi bele kumpre tuir prioridade ne’ebé maka ezekutivu sira foti. Entaun liña ministériu sira bele mai ho meiu oioin maibé UPMA nia serbisu mak asegura katak entidade governamentál sira ne’e ninia programa, sub-programa, atividade tenke kontribui duni ba prioridade ne’ebé Governu hakarak halo iha tinan-2020,” nia subliña.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here