Primeiru-Ministru, Taur Matan Ruak fó pose ba Prezidente Autoridade RAEOA-ZEESM foun, José Luís Guterres ‘Lugu’ iha Palásiu Governu, kuarta (13/11). Imajen Tatoli/António Gonçalves

DILI, 09 juñu 2020 (TATOLI)-Prezidente Autoridade Rejiaun Administrativa Espesiál Oé-Cusse Ambeno (RAEOA), José Luis Guterres, afirma sei kontinua fó kontribuisaun hodi dezenvolve Oé-Cusse to’o desizaun ikus atu sai husi kargu Prezidente Autoridade.

Eis Ministru Negósiu Estranjeiru ne’e hatutan sei simu kualker desizaun husi Primeiru-Ministru, Taur Matan Ruak, relasiona ho dinámika polítika ne’ebé akontese iha rai-laran daudaun ne’e.

Notísia Relevante :Reprezentate Povu Atoni Hatama Petisaun Hasai Lugu hosi RAEOA

“Ha’u hein de’it desizaun husi Primeiru-Ministru, Taur Matan Ruak, nian talves semana ne’e ha’u sei ba hasoru Xefe Governu, ha’u iha konsensia trankuilu tanba dever ha’u nia mak servisu no servisu to’o minutu ikus,” dehan José Luis Guterres, ba jornalista sira iha edifísiu MEJD Vila-Verde, tersa ne’e.

Notísia Relevante :Primeiru-Ministru Propoin José Luís Lidera RAEOA no ZEESM

Aleinde ne’e nia mós simu kualker krítika ne’ebé hato’o husi atoni oan no organizasaun sosiedade sivil kona-ba ninia servisu durante asume kargu iha RAEOA.

Notísia Relevante :Prezidente Repúblika Fiar José Luís Sei Susesu iha RAEOA-ZEESM

“Ha’u prontu simu krítika bainhira halo buat ruma laloos iha Oé-Cusse, ha’u laiha problema ida,”tenik Lugu.

Nia dehan krítika hirak ne’e parte ida husi liberdade espresaun husi sidadaun idaidak hodi kontribui ba prosesu dezenvolvimentu.

Entertantu, José Luis Guterres simu pose husi Primeiru-Ministru, Taur Matan Ruak, iha loron 11 fulan-novembru 2019.

Lugu ninia nomeasaun bazeia ba proposta rezolusaun Governu ne’ebé aprezenta husi Xefe Governu no hetan aprovasaun liuhosi reuniaun Konsellu Ministru iha loron 06 fulan-novembru.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here