Governu liuhusi ekipa BNCTL ho MSSI halo ona pagamentu subsidiu ba komunidade iha Suku Culu-hun. Imajen /Egas Cristovão

DILI, 09 juñu 2020 (TATOLI)-Administradór Postu Administrativu Cristo Rei Munisipíu Dili, Gaspar da Silva, hateten ninia komunidade husi aldeia tolu kuaze naran laiha lista pagamentu hodi hetan subsídiu governu $ 200 ba kada xefe família durante implementasaun Estadu Emerjénsia fulan-rua, marsu to’o maiu 2020.

Servisu Administrasaun Postu Administrativu Cristo Rei antes ne’e submete ona lista benefisiáriu ba Ministériu Administrasaun Estatál no Ministériu Solidaridade Sosiál no Inkluzaun (MSSI) hamutuk 14.969.

“Lista ne’ebé ami haruka ba nasionál ne’e hamutuk 14.969 maibé iha fallansu tékniku halo aldeia tolu iha Postu Administra Cristo Rei kuaze naran laiha hotu kedas, Aldeia tolu ne’e kompostu husi Suku Culuhun Aldeia Tanemutu, Suku Camea Aldeia Ailele Hun no Has Laran, maibé ida ne’e ami sei haree oinsá bele rezolve,”katak Gaspar da Silva, ba TATOLI iha Sede Suku Culuhun, ohin.

Postu Administrativu Cristo Rei iha Suku ualu maka Ailok, Becora, Camea, Hera, Balibar, Culuhun, Bidau Santana no Metiaút.

Iha sorin seluk, Xefe Suku Culuhun, Deus Dado Martins, hatete Suku Culuhun iha Aldeia hamutuk Aldeia hitu ho totál xefe família 1.743 maka sei simu subsídiu ne’ebé oferese hosi Governu.

“Husi lista ne’ebé ita submete ba nasionál aldeia ida mak lakon tiha, entaun osan ne’ebé atu halo pagamentu ne’e ba de’it Aldeia neen, Aldeia ida fali ho xefe família 156 tanba ne’e sei hein segundu faze tanba ami sei buka oinsá atu rezolve,”informa Autoridade Lokál ne’e.

Atu garantia distansiamentu fíziku ba prevensaun transmisaun COVID-19 maka BNCTL ho MSSI halo pagamentu ba komunidade sira kada aldeia

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here