Lider Karizmátiku, Kay Rala Xanana Gusmão, kontinénsia Primeiru Sarjentu Polísia, Amelia de Jesus Amaral. Imajen/Eugénio Pereira

DILI, 09 juñu 2020 (TATOLI)- Lider Karizmátiku, Kay Rala Xanana Gusmão, orgullu serbisu Primeiru Sarjentu Polísia, Amelia de Jesus Amaral, ne’ebé lidera Xefe Seksaun Vulneravel Person Unit (VPU) Komandu Polísia Munisipiu Covalima.

Ho orgullu ne’e, Komandante Ein-Xefe FALINTIL, Kay Rala Xanana Gusmão, espresa ho kontinénsia ba Primeiru Sarjentu Polísia, Amelia de Jesus Amaral, ne’ebé dedika-an fó asisténsia defende direitu vítima menoridade husi violasaun seksuál no insestu.

Xanana vizitaVulneravel Person Unit (VPU) Covalima. Imajen/Eugénio Pereira

Xanana  dehan, bainhira nia assume kargu Prezidente Repúblika no Primeiru-Ministru, tinan  sira liu ba, vizita ba Covalima, sempre hasoru Amelia nu’udar foto mesak halo serbisu ho kondisaun mínimu, maibé Amelia nunka lakon esperansa  sempre informa ninia difikuldade no progresu serbisu.

“Kada tinan ha’u mai, ha’u sempre hasoru ita-boot (Amelia), feto-ida serbisu di’ak tebes, tau matan ba ita nia oan feto sira-nia diretu, ne’e asaun umanu ida lori ita-nia serbisu sira hanesan ne’e importante tebes, tanba polísia la’ós implementa lei de’it, maibé haree mós serbisu umanu sira hanesan ne’e, maka ohin ha’u kontinénsia ne’e,” hateten Xanana.

Hamutuk ho Komisária Direitu Labarik, Dinorah Granadero, akompaña husi Komandante Polísia Munisipiu Covalima Superintendente, António Maria de Sá, Xanana hala’o vizita ba haree kondisaun serbisu VPU Covalima, hodi rona aprezentasaun husi Sarjentu Polísia, Amelia kona-ba obstákulu ba ekipamentu serbisu VIP, foin lalais ne’e.

Ho kondisaun serbisu ne’ebé mínimu, Xanana fó kedas apoiu sosa kalén 120 no besi konstrui kedas uma-mahon ne’e hodi fó asisténsia ba vítima sira.

Primeiru Sarjentu Polísia, Amelia de Jesus Amaral, sente orgullu, tebes dezde tinan 2009 nia serbisu hamutuk ho polísia feto-ida husi Nova Zelándia, Ceren maka apoia sira harii uma-mahon ne’e hodi fasilita sira nia serbisu.

“Ha’u sente ohin ne’e hanesan anju de guarda ida maka mai, e agradese tebes ha’u hato’o preokupasaun sira ne’e la too minutu, Avó Xanana resposta kedas nia apoiu ne’e la’ós haree ba ha’u nia nesesidade servisu, maibé atu fasilita ami bele halo servisu di’ak liután tau matan ba ita nia alin feto sira ne’ebé hasoru violénsia bazeia jéneru ne’ebé liga ho asuntu  feto, tanba baibain ne’e ami halerik, ohin hanesan milagre bele fó apoiu mai ami,” Amelia apresia.

Daudaun ne’e, Amelia mesak lidera serbisu VPU no hetan suporta husi Superintendente, António Mária de Sá, atu bele reforsa tan rekursu iha tempu besik.

“Superintendente, António Mária de Sá informa ba ha’u atu bele aumenta tan rekursu ida rua hodi ajuda ha’u,” nia hateten.

VPU Rejista Ona Kazu 20

Husi  janeiru too maiu 2020, VPU rasik rejista ona kazu krime 20 aprezenta ba Ministériu Públiku.

Kazu 20 ne’ebé rejista  kompostu husi violénsia doméstika 11, no kazu tentativu violasaun seksuál rua (2), abuzu seksuál tolu (3) no maltratu ba menoridade rua (2).

Xefe seksaun VPUA, Amelia rekoñese atu rezolve kazu menoridade sira ne’ebé sofre no trauma psikolojia la’ós buat fasil, presiza kapasidade natoon konsola vítima sira, oinsá simu realidade ne’e hodi hein prosesu justisa ba autór sira inklui lori vítima ba hela Uma Mahon Madre Salele.

Organizasaun feto sira ne’ebé durante ne’e koopera ho VPU maka, Fundasaun Alola, FOKUPERS, ALFELA no autoridade lokál sira sempre akompaña kazu krime públiku ne’ebé akontese presiza halo ezaminasaun forensik tenke refere ba PRADET para hetan ezaminasaun medical report nu’udar evidénsia hodi halo akuzasaun aprezenta ba Ministériu Públiku.

Númeru kazu violénsia doméstika iha Covalima rasik kada tinan aumenta makas tebes iha. “Ami haree katak, kazu violénsia doméstika ne’e akontese maka’as tebes iha Covalima,” nia tenik.

Atu redús númeru kazu ne’e, VIP koordena ho rede referral sira halo esforsu sensibiliza informasaun prevensaun krime ba komunidade sira iha área remota.

Primeiru Sarjentu Amelia hahú sai membru polísia iha 04 dezembru 2002, no durante 2014 too 2019 asume mós kargu nu’udar Prezidente Asosiasaun Feto Covalima.

Jornalista : Eugénio Pereira

Editór       : Francisco Simões  

HAKEREK NO HATÁN

Please enter your comment!
Please enter your name here