Embaixadór Indonézia mai Timor-Leste, Sahat Sitorus. Imajen Tatoli/Egas Cristóvão

DILI, 09 juñu 2020 (TATOLI)–Governu Indonézia liuhosi Embaxadór iha Timor-Leste, Sahat Sitorus, fó ninia apresisaun ba Timor-Leste ne’ebé oras ne’e daudaun moris iha estabilidade politika no nasaun viziñu ne’e hakarak atu rai ida-ne’e kontinua mantein situasaun ne’e hodi bele konsentra ba dezenvolvimentu.

Notísia Relevante: Indonézia Prontu Nafatin Kontrola Fronteira Terrestre

“Ami hanesan nasaun viziñu sente kontente ho novidade no situasaun ne’e, ho politika ne’ebé estável ona. Ha’u hein katak buat hotu ne’ebé iha ona bele la’o tuir regra no politiku sira bele iha ona entendimentu diak atu lori rai ne’e ba oin. Ida-ne’e mak ita ninia esperansa atu nune’e Governu no timoroan hotu konsentra ba dezenvolvimentu ne’ebé lais no di’ak liu iha tempu sira tuir mai ne’e,” dehan Sahat Sitorus ba jornalista sira hafoin rona direta esplikasaun kona-ba situasaun politika atúal hosi Prezidente Repúblika, Francisco Guterres “Lú Olo”, iha Palásiu Prezidente Nicolau Lobato, Bairru Pité, Dili, tersa ne’e.

Sitorus iha esperansa katak, bainhira surtu COVID-19 ramata, ema hotu bele fila-hikas ba moris ida-ne’ebé normál no mós hotu-hotu iha espíritu atu kontinua dezenvolvimentu ba rai ida-ne’e.

Diplomata ne’e konta tuir, durante audiénsia ne’e, Prezidente Repúblika hateten bainhira Governu ne’e mak laiha, sé loos mak atu atende situasuan COVID-19.

“Ida-ne’e hanesan esplikasaun ida di’ak tebes no fundamentu. Nune’e, ha’u haksolok tebes ho estabilidade politika oras ne’e daudaun . Hein katak instituisaun relevante sira sei mantein estabilidade ida-ne’e, atu nune’e konsentra ba dezenvolvimentu Timor-Leste ida ne’ebé di’ak liu,” diplomata ne’e subliña.

Iha loron hanesan, Prezidente Repúblika mós halo audiénsia ho Embaxadór Austrália iha Timor-Leste, Peter Roberts,  hodi esplika kona-ba novidade liuliu estabilidade politika Timor-Leste nian daudaun ne’e.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here