DILI, 09 juñu 2020 (TATOLI)–Ministra Edukasaun Juventude no Desportu (MEJD), Dulce de Jesus Soares, husu ba Diretór, Koordenadór eskola idaidak atu jere rekursu no fasilidade ne’ebé maka iha bainhira re-ativa prosesu aprendijazen.
Ministra dehan asuntu ne’e liga ho kondisaun sala eskola iha limitasaun kompara ho númeru estudante sira tanba ne’e susar atu garante distansiamentu sosiál no fizíku ba prevensaun surtu COVID-19 iha Timor-Leste.
“Ha’u husu ba Diretór, Adjuntu no Koordenadór eskola sira hotu atu uza sira-nia matenek ho kretativu hodi atua situasaun ne’e,” dehan Governante ne’e ba TATOLI, iha sala konferénsia imprensa MEJD, Villa-Verde, ohin.
Ho limitasaun no rekursu ne’ebé maka iha Governu fó konfiansa tomak ba eskola idaidak atu rezolve situasaun ne’e hodi funsiona prosesu aprendijazen ba estudante sira.
“Ha’u simu opiniaun di’ak husi dirijente eskola Akadiruhun katak sira sei utilija mós eskola filiál iha Núlaran Bairo dos Grilhos hodi reforsa tan sala aprendijazen, entaun ida ne’e ha’u hanoin diak tebes,”katak Ministra.
Governante ne’e afirma daudaun ne’e MEJD labele rezolve situasaun ne’ebé eskola sira enfrenta liliu liga ho kondisaun menus sala aprendijazen.
Jornalista : Tomé Amado
Editór : Agapito dos Santos
