Embaxadór Austrália iha Timor-Leste (TL), Peter Roberts. Imajen/Mídia PR.

DILI, 09 juñu 2020 (TATOLI)–Durante Situasaun Coronavirus (COVID-29), Governu Austrália nafatin fó atensaun ba estudante no traballadór timoroan sira ne’ebé oras ne’e hala’o hela estudu no servisu iha Austrália.

Notísia Relevante: Austrália Kontinua Prontu Servisu Hamutuk ho TL Kombate COVID-19

Embaxadór Austrália iha Timor-Leste (TL), Peter Roberts, hateten estudante timoroan sira iha Austrália liuliu sira ne’ebe mak hetan bolsu estudu no traballadór timoroan sira ne’ebé oras ne’e servisu iha Austrália, Governu Austrália sei kontinua fó apoiu.

“Estudante timor-oan iha Austrália, sira ne’ebe mak hetan bolsu estudu, Asutrália kontinua suporta nafatin. Bele hela iha Australia, no Australia sei kontinua fó apoiu,” dehan Embaxadór Austrália iha Timor-Leste (TL), Peter Roberts, informa asuntu ne’e ba jornalista sira, hafoin hala’o audiénsia ho Prezidente Repúblika (PR), Francisco Guterres “Lú Olo”, iha palásiu Prezidente Bairrupité, Dili., Peter hateten.

Kona-ba traballadór timor-oan sira, diplomata ne’e dehan, bele kontinua servisu nafatin no bele asesu ba Sistema saúde Australia ninian inklui sistema sira seluk tan.

“Agora daudaun mós ema barak bele hetan servisu foun,  Autrália kontinua suporta traballadór sira ne’ebé envolve iha programa Seasonal Workers Programme (SWP) inklui traballadór timoroan sira seluk iha austrália. Ha’u fiar katak programa ida-ne’e di’ak ba Timor-Leste no mós di’ak ba Austrália,” embaxadór ne’e esplika.

Nia mós rekoñese, timoroan sira ne’ebé mak oras ne’e servisu iha Asutrália fó impaktu importante no di’ak ba Asutrália ninia ekonomia. Nia fiar katak, di’ak ba Timor-Leste tanba timoroan sira bele hetan orsamentu hodi suporta ekonomia família iha Timor-Leste.

Entretantu, tuir dadus husi Sekretáriu Estadu Formasaun Profisionál no Empregu (SEFOPE) liuhosi dadus imajen jerál traballu Timor-Leste edisaun 9, Janeiru 2020 hateten Governu Timor-Leste ho Governu Austrália halo akordu iha tinan 2011 hodi Timor-Leste bele haruka traballadór sira ba iha Austrália ho prazu fulan neen (6) no liu, nu’udár traballadór sazonál iha área ospitalidade no ortikultura.

Dadus ne’e hatudu katak, akumulasaun hosi tinan 2012 too 2019, Governu Timor-Leste konsege haruka ona traballador nain-4,496 no  iha tinan 2019 hosi Janeiru to’o Dezembru, haruka ona traballadór hamutuk na’in-1.652.

Antes ne’e, Xefe Departementu Empregu Esteriór, Sekretariu Estadu Formasaun Profesionál no Empregu (SEFOPE), Belarmino da Cruz, relata traballadór timoroan ne’ebé servisu iha programa seasonal worker Austrália, hahú 2014 to’o 2018 konsege rekolla retornu milliaun $9,698,579.15 resin mai Timor-Leste (TL).

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here