Produtu vanilla ne’ebé hahú fa’an ona iha loja agrikultura Dili. Imajen/Espesiál.

DILI, 09 juñu 2020 (TATOLI) – Empreza boot balun husi Japaun hahú kontaktu ona Governu Timor-Leste liuhusi Embaixada Timor-Leste iha Japaun atu mai hala’o investimentu ba produsaun vanilla iha Timor-Leste.

Embaixadór Timor-Leste ba Japaun, Ilídio Ximenes da Costa, kaer liman ho eis Embaixadór Japaun ba Timor-Leste, I Wao Kitahara. Imajen/Embaixada TL ba Japaun

Embaixadór Timor-Leste ba Japaun, Ilídio Ximenes da Costa, dehan embaixada rasik simu ona karta ofisiál ida husi eis Embaixadór Japaun ba Timor-Leste, I Wao Kitahara, nu’udar fasilitadór hodi koordena empreza no Governu lokál Okinawa-Japaun, bele kria kooperasaun ho Timor-Leste hodi fasilita sira halo investimentu.

“Eis Embaixadór I Wao Kitahara, mak koordena ho investidór boot balun husi Governu lokál Okinawa hakarak atu halo investimentu kona-ba produtu vanilla iha Timor-Leste,” informa Embaixadór Ilídio Ximenes, ba Ajénsia Tatoli, ohin, liuhusi mensajen WhatsApp.

Empreza Japaun hakarak mai investe hahú husi kria plantasaun depois kuda too koleta bele fa’an fila-fali iha merkadu Japaun no nasaun seluk iha Europa.

Embaixada rasik kontaktu ona Ministériu Agrikultura no Peska (MAP) hodi fó dadus ba embaixada, tanba investimentu ne’e sei fó benefísiu direita ba ekonomia Timor-Leste no kria kampu serbisu ba Timoroan, grupu agrikultór sira kuda vanilla bele hetan osan no produtu ne’e bele fa’an ba rai li’ur.

Produtu vanilla rasik ninia presu iha merkadu mundiál karun liu fali kafé no nasaun kompradór vanilla boot liu iha mundu maka, Amerika, Japaun no nasaun seluk-tan.

Ilídio hatutan, bainhira MAP aprezenta ona dadus, sira sei koordena fali eis Embaixadór I Wao Kitahara, kontaktu investidór sira hodi diskute kle’an liután prosesu investimentu ne’e.

Iha fatin hanesan, Diretór Agro Komérsiu  Ministériu Agrikultura no Peska (MAP), Fernando Egidio Amaral, dehan Governu Timor-Leste prontu koopera atu fasilita investidór Japaun mai investe iha Timor-Leste.

“Ha’u hanoin inisiativa ne’e di’ak teb-tebes, tanba Japaun la’ós parseiru foun ida, tanba dezde 2003 Japaun sira mai apoiu ona ita iha área kafé no presu kafé fa’an ho presu di’ak iha merkadu Japaun, agora mai atu investe tan iha vanilla ne’e buat di’ak ida,” hateten  Diretór Fernando Egidio Amaral.

Tuir planu, iha semana ne’e, Diretór Fernando Egidio Amaral, sei halo relatóriu kompletu kona-ba dadus produtu vanilla iha Timor-Leste hodi haruka ba Embaixadór Ilídio hodi aprezenta empreza Japaun.

MAP rasik iha 2011-2012 too 2019, hahú halo expansaun produtu vanilla ne’ebé Grupu Agrikultura sira iha Suku Leimia Sorin, Postu Administrativu Hatulia, Munisípiu Ermera.

Grupu sira ne’e  kuda ona vanilla ektare 20-liu, maibé daudauk ne’e agrikultór sira foin prodús no koleta vanilla ektare 15 maka fa’an ba merkadu Timor-Leste ho presu boot.

MAP fó apoiu mós ba grupu agrikultura iha área Aileu, Manufahi, Maubara, Fatubesi nian mós hahú kuda ona hodi fa’an iha Loja Agrikultura Ministériu Agrikultura no Peska iha Dili.

“Hahú 2011 too 2019, Grupu Agrikultór sira iha Leimia Sorin-Hatulia halo koleta vanilla ba ninia rendimentu mínimu $5.000 no balu hetan too $32.000 liu,” nia hateten.

Iha merkadu internasionál vanilla ne’ebé ninia kualidade fuan di’ak ho ninia naruk mínimu 12- 14 sente-metru, másimu 12 too 20 sente-metru fa’an iha merkadu ho $57 pur kilograma.

Tuir planu Governu Timor-Leste sei fó sertifikadu rekoñesimentu ba produtu vanilla atu fa’an ho presu di’ak ba rai li’ur.

Durante ne’e MAP mós fó apoiu fini ba vanilla grupu agrikultura Leimia Sorin ho osan  $2.000 hodi kompras ekipamentu no apoiu téknika oinsá prepara kondisaun fatin mahon ba vanilla tau iha plástiku metan polybag hodi hahú kuda no kuidadu vanilla too tempu funan no prosesu fó kaben ba vanilla atu bele moris ho di’ak.

Alende kuda vanilla, agrikultór sira presiza kontrolu mós produtu ne’e atu labele hetan moras. Nune’e bainhira vanilla moris too funan bele fó kaben halo koleta iha tempu ida di’ak liu.

Atu kuda vanilla presiza kumpre kritériu importante sira hanesan, iklima, avalia temperatura, rai udan di’ak, prepara rai ne’ebé di’ak, no intensitasi loro-matan.

Diretór Fernando Egidio Amaral, hatutan MAP nia planu hakarak kapasita agrikultura sira iha Timor-Leste bele iha sentru prosesamentu rasik ida hodi halo fermentasaun, habai no bele fa’an vanilla nia funan ne’ebé maran ona.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here