Atividade iha Portu Tibar. Imajen Tatoli/António Gonçalves

DILI, 09 juñu 2020 (TATOLI) – Durante implementasaun Estadu Emerjénsia dahuluk no daruak relasiona ho prevensaun COVID-19 iha Timor-Leste, Kompañia Internasionál China Harbour Timor,Lda, Unidade Jestaun Portu Baía Tibar, konsesionária Timor Port no Kompañia  Bolloré deside suspende atividade konstrusaun Potu Tibar, maibé Estadu Emerjénsia datoluk ne’e hahú normaliza atividade.

Diretór Kompañia China Harbour Timor, Wang Wei, hateten progresu konstrusaun Portu Tibar kontinua la’o to’o ohin loron, maski sei iha Estadu Emerjénsia nia laran. 

“Oportunidade ne’e atu aselera progresu servisu ho seguru no kondisaun saúde di’ak. Ami admite ami-nia traballadór sira hodi filafali ba idaidak ninia pozisaun gradualmente ne’ebé atu foti asaun hodi aselera progresu sira ne’ebé mak liu ona, nune’e ami fiar katak sei bele fó susesu ba projetu nasionál importante ba povu Timór hotu,” tenik Diretór kompañia xineza ba Agência Tatoli liuhosi email, tersa ne’e.

Dirijente ne’e konsidera, susesu projetu ne’e tanba hetan suporta husi Governu, líder nasionál sira, Unidade Jestaun Portu Baía Tibar no Konsesionária Timor Port ne’ebé fó suporta másimu ba projetu refere, maka husu ba kontratór sira atu kontinua servisu maibé presiza kria kondisaun liuhosi meiu prevensaun COVID-19.

Durante surtu globál ne’e, tanba kompañia haree ekipamentu báziku ba médiku menus iha merkadoria Timor-Leste no labele garantia seguransa no kondisaun médiku servisu ba traballadór hotu maka kompañia deside temporáriamente suspende kuaze traballadór hotu inklui servisu krítiku balun paradu to’o iha fulan-maiu.

“Timor-Leste nia susesu boot luta kombate surtu COVID-19, liuhosi servisu no medida ne’ebé foti husi Sentru Integradu Jestaun Krize (CIGC, sigla portugés) ne’ebé lidera direita husi Primeiru-Ministru, Taur Matan Ruak, rezulta laiha kazu konfirmadu maka eziste tan to’o kazu ikus iha loron 15 maiu. Timor-Leste sai hanesan nasaun ida ne’ebé maka susesu halakon dezastre globál ne’e,” nia salienta.

Maski re-ativa ona atividade projetu Portu Tibar, maibé kontinua asegura medida Organizasaun Mundiál Saúde (OMS) ba prevensaun COVID-19 ho regirozu ba funsionáriu husi China Harbour inklui funsionáriu seluk husi Unidade Jestaun Projetu Portu Baia Tibar, konsesionária Timor Port, Worley Parson Consultant, no Enjeñeiru independente EGT/FASE.

“Kontrola no medida prevensaun ami aplika rigorozu liu lei sira ne’ebé maka iha. Ema hotu hatudu sira-nia disiplina di’ak no respeitu ba jestaun internál, lei no regulamentu ne’ebé mak iha Estadu Emerjénsia to’o ohin loron to’o ita laiha kazu konfirmadu no kazu suspeitu COVID-19,” Wang Wei subliña.

Kona-ba funsionáriu no ofisiál estranjeiru, nia dehan ho kuantidade mínimu iha akampamentu kompañia nian iha Suku Ulmera desde janeiru to’o ohin loron atu hamenus risku COVID-19 atu espalla iha área akampamentu nia-laran no ba komunidade sira ne’ebé mak hela besik.

“Ema hotu obrigatóriu tenke uza máskara ne’ebé mak oferese gratuita husi kompañia durante loron servisu no iha fatin entrada iha bee atu fase liman, kada ekipa tenke na’in-10 atu mantein distansiamentu sosiál kada loron, monitoramente temperatura isin no rejistu antes tama iha área servisu nian, karik temperatura ema nian a’as liu 37.3°C maka sei responde ho planu emerjénsia imediata no bandu hodi tama ba área servisu no lori ema refere ba kuidadu saúde,” nia subliña.

Totál traballadór  timor-oan ne’ebé servisu iha projetu Portu Tibár hamutuk 288, kompostu husi traballadór na’in-42 kontratu direitamente husi China Harbour no  na’in-246 kontratu husi ajénsia ho naran 2WJ.

“Iha Estadu Emerjénsia daruak, temporariamente ami asegura traballadór na’in-40 hodi kontinua servisu no iha kontratu servisu kuaze traballadór hamutuk na’in-240 maka suspende. Durante estadu Emerjénsia datoluk, ami bolu fila-fali traballadór 120 atu kontinua servisu,” Diretór kompañia ne’e informa.

Kona-ba saláriu, China Harbour selu ba sira ne’ebé mak kontinua servisu, maibé suspende no la’ós kontratu direita husi China Harbour bazeia ba kódigu laborál sei halo diskusaun ho Governu liuhosi Sekretáriu Estadu ba Formasaun Profisionál no Empregu.

Fó konsiderasaun ba traballadór sira ne’ebé mak moris difísil hodi oferese subsídiu ai-han hanesan foos.

Nune’e mós, China Harbour akompaña Ajénsia Traballadór 2WJ hodi submete saláriu ba traballadór durante Estadu Emerjésia, tuir Diploma Ministériu Solidaridade Sosiál no Inkluzaun (MSSI) númeru 17/2020 no Dekretu-Lei númeru 16/2020

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here