Sekretáriu Estadu Kooperativa, Arsénio Pereira da Silva. Imajen Tatoli/Egas Cristovão

DILI, 09 juñu 2020 (TATOLI) – Sekretáriu Estadu Kooperativa demisionáriu, Arsénio Pereira da Silva, hasoru malu ho Primeiru-Ministru, Taur Matan Ruak hodi entrega relatóriu ikus kona-ba prosesu servisu durante mandatu tinan rua nian laran.

“Normalmente kuandu Xefe Governu konvida nia membru sira atu partilla informasaun, liuliu servisu sira ne’ebé durante ne’e halo. Tanba ne’e maka ha’u mai lori kedan ha’u-nia relatóriu implementasaun programa iha 2019 ninian,” dehan Arsénio hafoin ramata enkotru ho PM Taur iha Palásiu Governu, tersa ne’e.

Iha loron 25 maiu, Arsénio Pereira hamutuk ho membru governu demisionáriu na’in-haat seluk hanesan Ministru Negósiu Estranjeiru no Kooperasaun, Dionísio da Costa Babo Soares, Ministra Edukasaun, Juventude no Desportu, Dulce Soares, Vise-Ministru Administrasaun Estatál, Abílio Caetano, no Sekretáriu Estadu Juventude no Desportu, Nelio Isaac Sarmento hasoru Xefe Governu hodi hato’o karta demisaun, atu kumpre desizaun Partidu CNRT.

Notísia Relevante: Membru Governu CNRT Na’in-Lima Hasoru PM Taur, Arsénio: “Desizaun Partidu Tenke Kumpre”

Nia haktuir, enkontru ho Xefe Governu la’ós despedida maibé hato’o de’it relatóriu ikus.

“Tuir lei kuandu iha membru governu foun ne’ebé atu troka ami mai ona maka foin halo hand over atu troka ha’u nian fatin, tanba ne’e maka tenke prepara. Agora daudaun ami sei hein hela bainhira maka atu mai tenke entrga atubele kontinua buat ne’ebé iha ona nune’e bele halo dezenvolvimentu,” tenik Arsénio.

Durante enkontru, nia parte ho PM Taur ko’alia kona-ba programa Sekretaria Estadu Koopetariva (SEKoop) nian, ne’ebé agora daudaun implementa desde tinan kotuk maski iha rejime duodesimál.

“Primeiru-Ministru kontente tebes tanba ha’u esplika buat barak kona-ba programa ne’ebé detallu hanesan tékniku. Maibé tanba iha mudansa situasaun polítika maka ohin ha’u mai relata ha’u-nia relatóriu. Ha’u iha kompromisu katak sei prepara relatóriu antes ha’u sai, ne’ebé hanesan última relatóriu durante mandatu,” nia akresenta.

Nia esplika, durante mandatu SEKoop haree liu ba área kooperativa ne’ebé tuir dekretu lei iha ramu 12, maibé iha programa dahuluk ne’ebé maka SEKoop halo maka foka liu ba kooperativa no produsaun, liuliu iha produsaun agríkola ne’ebé durante ne’e sai hanesan produsaun prima.

“Iha Batar Foos Kay Rala (Bafo Kayrala) ne’ebé iha relatóriu kuaze relata kona-ba asuntu ne’e,” Arsénio salienta.

Tuir nia, daudaun ne’e Bafo Kay Rala rasik prodúz ona tonelada 600 resin iha territóriu laran tomak no agora tau hotu iha sentru kooperativa multi setorál atubele fa’an.

“Ida-ne’e maka hanesan sai ha’u nian susesu istória durante ne’e, iha programa seluk maka hanesan boa governasaun SEKoop nian iha 2019 atu implementa iha servisu administrasaun no halo ezekusaun ba orsamentu. Ha’u-nia relatóriu sita hotu ezekusaun SEKoop,” Arsénio konta tuir.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here