MANATUTO, 09 juñu 2020 (TATOLI) – Iha Polítika Orsamentu Jerál Estadu (OJE) 2021, Ministériu Justisa (MJ) sei aposta programa atendimentu emisaun pasaporte eletróniku iha nasaun-haat.
Notísia Relevante : Governu Lansa Emisaun Pasaporte Eletróniku ba Munisípiu-10
Nasaun sira ne’ebé MJ planeia ona iha programa emisaun pasaporte eletrónika ne’e mak hanesan Portugal iha Lizboa, Reinu Unidu iha Londres, Australia iha Canberra ho Korea du Sul.
Ministru Justisa, Manuel Cárceres da Costa, hateten governu hanoin atu halo atendimentu emisaun pasaporte eletrónika tanba timoroan barak mak buka sira-nia moris iha rai sira-ne’e.
“Ita hanoin sei tau planu ba tinan 2021 karik, Maromak fó tulun bele realiza hodi estabelese serbisu konsulár nune’e bele fasilita atendimentu pasaporte ba timoroan iha nasaun hirak ne’e,” hateten Ministru Manuel Cárceres da Costa, liuhusi nia diskursu iha ámbitu lansamentu emisaun pasaporte eletróniku ba munisipiu 10, ohin, hala’o iha edifísiu Servisu Notariadu Munisípiu Manatuto.
Planu ministériu nian ne’e bele fasilita sidadaun timoroan sira iha diaspora bele emite pasaporte inklui halo renovasaun pasaporte.
Manuel Cárceres da Costa hateten, presiza mós kompleta lejizlasaun balun no presiza serbisu hamutuk ho Ministériu Negósiu Estranjeiru no Kooperasaun (MNEC) hodi halo diplomasia ho embaixada Timor-Leste nian iha nasaun hirak ne’e.
Jornalista : Nelson de Sousa
Editór : Francisco Simões
