Xefe Suku Gariuai, Postu Adsministrativu Baucau Vila, Munisipiu Baucau, Arlindo Marcal. Imajen/Facebook.

DILI, 08 juñu 2020 (TATOLI)–Xefe Suku Gariuai, Postu Administrativu Baucau Vila, Munisípiu Baucau, Arlindo Marcal, preokupa ho sistema hosi nasionál ne’ebé benefisiáriu sira ho saláriu ka rendimentu $501 dehan la simu subsídiu uma-kain $200 maibé realidade naran taka sai iha lista subsídiu uma-kain nian.

Notísia Relevante: Benefisiáriu Saláriu $501 Mak Simu Subsídiu Sei Hasoru Lei

Xefe Suku ne’e hatutan, nia preokupa tanba iha lista editadu ba pagamentu subsídiu nian ne’e, iha diretór balun nia naran sai nafatin iha lista subsídiu atu simu osan.

“Ha’u preokupa tebes ho diretór no empreza privadu sira ne’ebé mak naran sai iha lista subsídiu uma-kain ne’ebé atu simu subsídiu $200 ne’ebe selu hosi Governu Timor-Leste,” dehan Xefe Suku Gariuai, Arlindo Marçal, ba Ajénsia TATOLI liuhosi telefonika, segunda ne’e.

Tanba ne’e, mia rekomenda ba Governu liuliu ministériu kompetente (MSSI) atu tau matan ba kestaun hirak ne’e tanba ida-ne’e mak bele hamosu dezentendentu iha públiku nia leet.

“Nu’udar autoridade komunitáriu, ha’u hakarak rekomenda ba Governu katak presiza haree ba kestaun hirak ne’e, tanba ida-ne’e bele hamosu dezentendentu iha terrenu no komunidade nia leet. Tanba ne’e, ha’u husu ba parte relevante hanesan MSSI  ne’ebé toma konta ba lista subsídiu uma-kain nian, tenke toma responsabilidade,” Xefe Suku Gariuai ne’e hateten.

Aleinde ne’e, nia informa totál dadus uma-kain ne’ebé atu simu subsídiu uma-kain $200 iha Suku Gariuai hamutuk uma-kain 1.545 hosi aldeia ualu (8) ne’ebé pertense ba Suku Gariuai

Hosi totál dadus uma-kain refere, Aldeia Bahamori hamutuk uma-kain 281, Aldeia Cairiri hamutuk uma-kain 163, Aldeia Darasula hamutuk uma-kain 152, Aldeia Gariuai hamutuk uma-kain 124, Aldeia Maucale hamutuk uma-kain 241, Aldeia Uaibeana hamutuk uma-kain 177, Aldeia Uaturau hamutuk uma-kain 187, no Aldeia Uatu-ua hamutuk uma-kain 220.

Hosi total dadus hirak ne’e, nia informa, lista editadu ne’ebé Ministériu Solodariedade Sosiál no Inkluzaun (MSSI) fó sai hamosu konfuzaun tanba dadus ne’e redús to’o 1.509 de’it.

“Bainhira ami simu fali dadus hosi Nasionál redús to’o 1.509 de’it ona, ne’ebé halo ami konfuzaun. Ohin, ha’u konfirma tiha ona ba parte kompetente katak sei halo fali reklamasaun ida ba simu fali iha segunda faze nian,” nia dehan.

Nia haktuir, xefe família ne’ebé barak liu naran la sai iha lista editadu subsiodiu nian ne’e mak mai hosi Aldeia Bahamori, Aldeia Maucale no Aldeia Uaturau.

Notísia Relevante: Ohin, Ekipa Pagamentu Subsídiu $200 Dezloka ba Munisípiu

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here