Kay Xanana Gusmão tara tais ba Vise Ministra Solidariedade Sosiál no Inkluzaun (MSSI) Signi Sandra Wati Verdial. Imajen/Eugénio Pereira

COVALIMA, 08 juñu 2020 (TATOLI) – Sentru Esperansa Ba Feto ka Uma Mahon Salele, Suku Modemo, Postu Tilomar, Munisípiu Caovalima, oras ne’e, sai mahan ba vítima violénsia seksuál, insestu, violénsia bazeia ba jéneru inklui labarik abandonadu  na’in-45.

Diretora Uma Mahon, Madre Santina Imaculada de Oliveira, informa,  vítima sira ne’e mai la’ós mai deit husi Covalima, maibé balun mai mós husi Munisípiu Viqueque, Dili, Baucau, Manufahi, Ainaro, Bobonaro, Aileu no Ermera.

Nia informa, husi vítima sira-ne’e, na’in-40 feto no na’in-lima (5) labarik ki’ik sira ne’ebé inan-aman no família abandona tanba kauza husi problema família.

“Maioria labarik sira ne’e hasoru tipu violénsia seksuál, abuzu seksuál, insestu, inan -man abandona inklui mós tráfiku umanu ne’ebé mai husi área rurál sira ne’ebé risku boot tebes hasoru violénsia,” informa Madre Santina, iha ámbitu selebrasaun Loron Mundiál Labarik nian hamutuk ho Komisaun Nasionál Direitu Labarik iha Salele, sábadu (06/06).

Selebrasaun loron mundiál ba labarik ho tema “Prevene Violénsia no Hakotu Direitu Labarik, Obrigasaun Estadu” ne’e partisipa mós husi Lider Karizmátiku, Kay Rala Xanana Gusmão.

Nia hatutan, tinan-tinan, uma mahon sempre simu vítima menoridade bele too ema na’in-55 ba leten ho sira nia oan sai vítima no sofre psikolojia  ho problema ne’ebé sira hasoru.

Madre Santina hatutan, serbisu ne’ebé sira hala’o hamutuk ho Ministériu Solidariedade Sosiál no Inkluzaun (MSSI), Rede Feto, ALFELA, Polísia hodi apoia sira iha prosesu legál buka rezolve problema no aprezenta ba Ministériu Públiku.

Uma Mahon ne’e mós hetan apoiu fundus husi MSSI inklui mós apoiu husi Embaixada Austrália no Komandante Ein-Xefe FALINTIL, Kay Rala Xanana Gusmão. Maibé orsamentu ne’e dala barak la sufisiente atu tau matan ba menoridade sira ne’ebé isin rua hodi partu iha uma mahon.

“Difikuldade ne’ebé ami hasoru maka dala ruma osan la too atu tau matan ba feto sira ne’ebé ho kondisaun isin rua mai hela iha ne’e too bebé moris,”  hateten Madre Santina.

Iha fatin hanesan  Lider Karizmátiku, Kay Xanana Gusmão, dezafia setór judisiáriu sira iha Timor-Leste no organizasaun sira ne’ebé serbisu ba direitu labarik sira tenke ativu hodi buka solusaun ba vítima sira ne’ebé sofre iha kazu hirak-ne’e.

Xanana louva ho serbisu Sentru Esperansa Ba Feto ne’ebé ho fuan boot no domin akomoda  inan-feton no labarik feto sira ne’ebé sai  vítima ba kazu oioin bazeia ba jéneru.

Tuir Xanana, uma mahon ne’e merese atu hetan apoiu orsamentu husi Governu no parseiru sira uza osan hodi kuidadu labarik.

Xanana hato’o agradese mós ba Vise Ministra Solidariedade Sosiál no Inkluzaun (MSSI, Signi Sandra Wati Verdial, ne’ebé halo vizita no kontinua apoia vítima sira iha uma mahon refere.

“Ha’u fó apresu boo tebetebes ba imi nia serbisu solidariedade, tanba tau matan ba ita oan sira ne’e importante,” nia hateten.

Husu Fundasaun Alola Vizita Ba Salele

Madre no labarik sira iha Sentru Esperansa Ba Feto Salele, Cavalima, simu prezensa Kay Rala Xanana Gusmão. Imajen/Eugénio Pereira

Iha oportunidade ne’e, Xanana husu ba Fundasaun Alola atu halo vizita ba madre sira iha Salele hodi buka apoiu no haree problema sira ne’ebé sira hasoru hodi buka solusaun.

“Ha’u apela ba Fundasaun Alola favor ida bele haree no kombina ho madre sira hodi haree sira-nia programa no kbiit ne’ebé sira iha bele hasa’e no prodús rekursu iha ne’e bele prepara sira ba moris foun no hasees husi sitasaun risku no perigu ba ita nia oan feto sira ne’e rasik,” Xanana hateten.

Iha parte seluk, Vice Ministra Solidariedade Sosiál no Inkluzaun (MSSI) Signi Sandra Wati Verdial dehan, governu sei kontinua apoia fundus ba Uma Mahon Salele, inklui organizasaun sira seluk ne’ebé luta hodi tau matan ba vítima sira bazeia ba jéneru.

Biban ne’e, Komisária Komisaun Direitu Labarik (KDL), Dinorah Granadeiro, esklarese katak, selebrasaun loron mundiál iha Uma Mahon Salele ho tema “Prevene Violénsia no Hakotu Direitu Labarik, Obrigasaun Estadu” nu’udar asuntu importante ida ba KDL buka solusaun mós ba problema ne’ebé labarik feto sira enfrenta.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here