Portavóz CIGC, Odete Viegas. Imajen Tatoli/Egas Cristovão

DILI, 08 juñu 2020 (TATOLI) – Liuhosi Sala Situasaun, Sentru Integradu Jestaun Krize (CIGC, sigla portugés) konfirma katak rezultadu teste husi vijilánsia sentinela ne’ebé hala’o desde loron 5 to’o 15 maiu inklui suspeitu hatudu rezultadu negativu hotu.

“Husi rezultadu vijilánsia sentinela hamutuk 820 no mós ba suspeitu 73 nia rezultadu porsentu 100 negativu hotu,” informa Portavóz CIGC, Odete Viegas liuhosi konferénsia imprensa iha Sentru Mídia COVID-19, iha Sentru Konvensaun Dili (CCD, sigla portugés), segunsa ne’e.

To’o ohin loron 08 juñu, ema ne’ebé halo ona vijilánsia sentinela hamutuk 875 no ema hirak ne’e mai ho sintoma infesaun respiratóriu no tama iha fasilidade saúde, ikus mai tama iha triajen hodi hasai amostra.

“Husi suspeitu 73, bainhira aumenta ho kazu Suai ne’ebé negativu, entaun suspeitu hamutuk 74,” nia akresenta.

Portavóz ne’e subliña, hahú 25 abríl, kazu ikus ne’ebé deteta pozitivu liu ona loron-45 maibé to’o oras ne’e seidauk iha kazu foun.

“Estadu Emerjénsia dahuluk no daruak ita konsege kontein, deteta, izola no trata. Iha Estadu Emerjénsia faze daruak Ministériu Saúde hamutuk ho CIGC hala’o atividade vijilánsia iha territóriu laran tomak, ne’ebé foti amostra vijilánsia sentinela husi suspeitu sira. rezultadu amostra ba ema hotu ne’ebé maihusi prosesu triajen iha ospitál referál, nasionál inklui sentru saúde sira iha munisípiu laran tomak no ema ne’ebé iha kazu infesaun respiratóriu sei hasai amostra iha laboratóriu no ema ne’ebé suspeitu, ema ne’ebé fila husi kuarentena, ema ne’ebé iha kontaktu ho pozitivu ka ema sira ne’ebé iha istória viajen,’ nia esplika.

Daudaun ne’e, rezultadu laboratóriu ne’ebé sei hein rezultadu hamutuk 31, inklui vijilánsia sentinela mós nafatin halo teste.

Ema ne’ebé sei iha kuarentena hamutuk 58 iha Dili no munisípiu, barak liu maka iha munisípiu ne’ebé iha fronteira hanesan Maliana, Suai no Oé-cusse no auto-kuarentena 56, enkuantu pasa ona kuarentena loron-14 hamutuk 2.397.

Hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu rejista iha loron 24 abríl ho totál konfirmadu na’in-24 no provável na’in-haat.

Husi totál konfirmadu ne’e, na’in-22 rejista iha Kapitál Dili enkuantu na’in-rua seluk rejista iha Munisípiu Liquiçá.

Iha loron 15 maiu, liuhosi Sala Situasaun, CIGC deklara pasiente konfirmadu no provável rekuperadu hotu ona.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no tama mai Timor-Leste liuhosi dalan fronteira terrestre no aeroportu.

Hahú loron 15 maiu, sistema alerta no resposta COVID-19 iha Timor-Leste  ne’ebé antes ne’e iha alerta 3 ‘Mitigasaun’, fila ba faze alerta 1 ‘Kontensaun’, nune’e komunidade sira bele kontinua halo prevensaun ba an rasik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here