Prezidente Repúblika, Francisco Guterres Lú Olo. Imajen António Gonçalves

DILI, 08 juñu 2020 (TATOLI)–Prezidente Repúblika, Francisco Guterres “Lú Olo”, iha loron 5 fulan juñu (2020) promulga Dekretu-Lei kona-ba subsídiu temporáriu ba sidadaun timoroan ne’ebé hela temporária iha estranjeiru.

Komunikadu ne’ebé fó sai hosi Prezidénsia Repúblika, ohin, hakatuir dekretu-Lei ne’e loke dalan ba Estadu fó apoiu finanseiru ba sidadaun timoroan ne’ebé depende eskluzivamente ba rendimentu família ne’ebé hela iha Timor-Leste tanba implementasaun estadu emerjénsia ka taka fronteira nu’udár medida preventiva no kombate pandemia COVID-19.

Sidadaun timoroan sira ne’ebé hela temporária iha estranjeiru sei hetan apoiu finanseiru ho kondisaun hato’o deklarasaun hodi komprova difikuldade hetan meiu finanseiru atu suporta ba despeza diária no tanba fronteira ne’ebé taka labele fila fali mai Timor-Leste.

Subsídiu temporáriu ba sidadaun timoroan hela temporária iha estranjeiru ho periodisidade fulan-fulan durante implementasaun estadu emerjénsia iha Timor-Leste.

Atribuisaun subsídiu depende ba pedidu hosi timoroan sira ne’ebé interesadu hodi kolabora ho misaun diplomátika Timor-Leste iha área ne’ebé rezide (kediaman) no liuhosi korreiu eletróniku dirije ba ofisiais misaun diplomátika.

Servisu diplomátiku sira iha direitu atu ejize aprezentasaun dokumentasaun nesesáriu ba pedidu no no hatudu difikuldade hetan apoiu finanseiru ba despeza diária nian.

Tuir Dekretu-Lei katak aprezentasaun dokumentu hodi komprova katak sidadaun timoroan iha direitu atu hetan apoiu finanseiru tenke kumpre prazu másimu loron-15 nia laran.

Ba sira ne’ebé hato’o deklarasaun falsa atu hetan apoiu finanseiru ne’e nia prosesu sei no husu atu fó-fila fali subsídiu imediatu bainhira hetan ona apoiu.

Nasaun sira ne’ebé sidadaun timoroan rezide iha estranjeiru atu hetan subsídiu temporáriu kada fulan mak Estadu Unidu Amérika ho valor  dolar 1000. España, Australia, Portugal no Italia ho osan dolar 500. Brasil, Cabo-Verde, Filipina, Malazia, Tailándia no Vietnam sei simu dolar 150. India, Indonezia no Tanzania sei hetan dolar 100. Montante subsídiu ne’e atribui ba sidadaun timoroan iha estranjeiru depende ba kustu moris kada nasaun nian.

Subsídiu temporária ba sidadaun timoroan iha estranjeiru sei selu hosi Fundu COVID-19. Ministériu Negosiu Estranjeiru no Kooperasaun mak entidade ida ne’ebé responsabiliza atu organiza lista benefisiáriu no hato’o ba Conselho de Gestão do Fundo COVID-19 hodi ezekuta tuir despeza.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here