Eis Sekretáriu Rejionál RAEOA-ZEESM,TL. Arsenio Bano. Imajen Tatoli/António Gonçalves

DILI, 08 juñu 2020 (TATOLI) – Primeiru-Ministru (PM), Taur Matan Ruak, konvoka reuniaun ho eis Sekretáriu Rejional Rejiaun Administrativa Espesiál Oé-cusse Ambeno (RAEOA) no Zona Espesiál Ekonomia Sosiál Merkadu, Timor-Leste (ZEESM,TL), Arsenio Bano. 

Hafoin reuniaun ramata, Arsenio Bano, apresia no kontente tanba Xefe Governu bele iha tempu hodi hasoru nia.

“Ha’u kontente tanba Primeiru-Ministru bele iha tempu hasoru ha’u, husu oituan kona-ba situasaun iha Oé-cusse nian. Ha’u mai mós rona orientasaun no rona mós lia-fuan murak barak husi Xefe Governu atu ba oin rai ne’e atu la’o oinsá? Ha’u só dehan de’it ba maluk Oé-cusse tomak katak kalma, la persiza hirus-malu, dun-malu, no husik ba Primeiru-Ministru no ninia gabinete atu haree asuntu ne’e,” nia dehan iha Palásiu Governu, segunda ne’e.

Biban ne’e, nu’udar Oé-cusse oan no mós ema ne’ebé envolve ona iha jestaun RAEOA-ZEESM,TL, nia rekoñese dezenvolvimentu iha Oé-cusse la fásil tanba oras ne’e daudaun nasaun hotu enfrenta situasaun surtu COVID-19

“Vírus ne’e muda situasaun iha mundu tomak, la’ós de’it iha Timor-Leste, ne’e atu hateten katak ekonomia mós la’o la fásil, transporte, no seluk tan, maibé Governu Sentrál iha inisiativa atu halo estabilizasaun ba ekonomia rai-laran,” nia akresenta.

Arsenio haktuir, nia parte hetan orientasaun husi PM Taur ho lista naruk ne’ebé naruk tebes, maibé tuir nia importante maka Oé-cusse atu ba oin.

“Ha’u aleinde nu’udar eis Sekretáriu Rejionál no mós nu’udar eis titulár, ha’u mós ema Oé-cusse, tanba ne’e ha’u koñese Oé-cusse di’ak tanba servisu durante tinan-lima iha Oé-cusse no ha’u mak halo estudu iha ne’ebá. Doutór Marí Alkatiri mak hahú no servisu barak la’o, tanba ne’e mak Primeiru-Ministru bolu ha’u atu konversa oituan atu hatene situasaun no hanoin atu hakat ba oin,” subliña eis Prezidente Autoridade RAEOAv interinu ne’e. 

Jornalista: Antónia Gusmão

Editora: Julia Chatarina 

 

HAKEREK NO HATÁN

Please enter your comment!
Please enter your name here