Portavóz CIGC, Odete Viegas. Imajen Tatoli/Egas Cristovão

DILI, 08 juñu 2020 (TATOLI) – Portavóz Sala Situasaun, Sentru Integradu Jestaun Krize (CIGC sigla Portugés), Odete Viegas, informa pasiente ne’ebé maka deskonfia COVID-19 iha Suai daudaun ne’e nia rezultadu konfirma negativu.

“Amostra haruka ona ba Dili desde horikalan no hatudu kedan rezultadu negativu,” tenik Odete Viegas liuhosi konferénsia imprensa iha Sentru Mídia COVID-19 iha Sentru Konvensaun Dili (CCD, sigla portugés), segunda ne’e.

Nia konta tuir, sidadaun ne’e hetan sintoma COVID-19 hanesan isin manas, kakorok moras, dada iis susar, nune’e iha domingu lorokraik tama iha fatin izolamentu iha Ospital Referál Suai.

Tanba ne’e maka, ekipa husi laboratóriu hasai kedan amostra no ekipa vijilánsia ba hasai kedan nia istória kona-ba pasiente ne’e nia kontaktu durante semana ida nian-laran.

Nune’e mós, ekipa vijilánsia epidemilojia hasai amostra husi pasiente ne’e ninia kaben tanba iha kontaktu ho pasiente.

“Pasiente ne’e nia ferik-oan laiha sintoma maibé ita mós foti nia amostra inklui ema 20 ne’ebé maka daudaun ne’e tama ona mós iha auto-karantina Suai. Ekipa iha terrenu foti ona amostra atu haruka mai iha laboratóriu atu hatene nia rezultadu,” nia akresenta.  

Antes ne’e, iha loron 4 juñu pasiente ba Ospital Referál Suai atu halo konsulta maibé pasiente isin manas mear ladún iha maibé nia ladún nakloke nian-an ba profisonál saúde sira, ikus mai profisionál saude sira fó ai-moruk no haruka nia fila.

“Iha domingu nia sente katak todan entaun nia mai iha Ospitál Referal Suai no ema ne’e nia laiha istoria viajen maibé nia iha istória kontaktu hanesan servisu negosiante iha mota masin ne’ebé maka hatun no hasae sasán no iha kontaktu ho ema sira hodi karreta,” Odete esplika.

CIGC apela negosiante sira ne’ebé maka daudaun halo servisu iha área fronteira atu fó atensaun másimu ba sira-nia an atu kuidadu no implementa medida preventiva ne’ebé maka estabelese ona husi Ministériu Saúde no Organizasaun Mundiál Saúde.

“Kuandu iha sintoma ruma tenke hakbesik ba fasilidade saúde no tenke hateten istória loloos tanba kuandu ita la hateten loloos ita bele lakon ema balun ne’ebé maka iha kontaktu no iha sintoma hotu, nune’e ema hotu ne’ebé maka halo servisu iha fronteira presiza tau atensaun,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here