Diretór Ezekutivu FONGTIL, Daniel Santos do Carmo. Imajen Tatoli/Cipriano Colo

DILI, 08 juñu 2020 (TATOLI) – Fórum Organizasaun Naun Govermentál Timor-Leste (FONGTIL) husu ba Governu atu iha elaborasaun Orsamentu Jerál Estadu (OJE) 2020 no 2021 bele investe maka’as liu iha setór sosiál ne’ebé fó benefísiu direita ba sidadaun sira.

“FONGTIL ko’alia dezde iha momentu restaurasaun independénsia to’o agora, husu nafatin tenke investe iha setór sosiál, liuliu iha setór saúde, edukasaun, infraestutura báziku, bee no sameamentu, agrikultura no turizmu, tanba setór sira ne’e mak ita tenke haree tanba liga direita ho povu nia moris,” tenik Diretór Ezekutivu FONGTIL, Daniel Santos do Carmo, liuhosi konferénsia imprensa iha edefísiu FONGTIL, Caicoli, segunda ne’e.

Tuir nia, bainhira investe iha setór sosiál, bele fó benefísiu direita ba povu nia moris inklui hamenus ona dependénsia Estadu Timor-Leste ba Fundu Petrolíferu.

“Iha fulan-tolu ikus, durante períodu pandemia COVID-19, afeta tebes ba investimentu iha Fundu Petrolíferu ne’ebé lakon kuaze biliaun $1,8 tanba folin Mina iha mundu tun porsentu 18 sai $20,43 kada barríl tanba demanda merkadu internasionál,” nia akresenta.

Tanba ne’e, Diretór ne’e dehan, folin mina no gás  depende ba merkadu internsionál, ne’ebé tempu ona iha tinan oin (2021) presiza investe área produtivu sira hodi diversifikasaun ekonomia iha rai-laran.

‘Ita-nia riku-soin iha tasi laran mós komesa menus ba bebeik, folin mina iha merkadu tun  ne’ebé ita presiza investe iha setór produtivu sira atu sustenta ita-nia orsamentu ka rekursu ba ita-nia dezenvolvimentu iha tempu naruk,” nia argumenta.

Nia mós rekomenda Governu atu hahú agora ba oin tenke investe iha setór sosiál, liuliu komérsiu no industria atu diversifika ekonomia hodi fó rendimentu ba Estadu atu subititui dependénsia ba Fundu Petrolíferu.

“Diversifikasaun ekonomia kuandu forte ne’e  ema matenek barak, ema sáude di’ak, ema ai-han natoon no osan bele menus maibé bele fó osan ba Estadu no apoiu liuhosi rendimentu hodi sustenta mákina Estadu iha futuru,” nia subliña.

Antes ne’e, iha programa VIII Governu, fóprioridade lima hanesan Kapitál Sosiál, Dezenvolvimentu Ekonómiku, hadi’a Konetividade Nasionál, Konsolidasaun no Hametin Seguransa no Relasaun Esterna no Konsolidasaun no Hametin Justisa, Demokrasia no Direitu Umanu.

Totál porsentu 28,4 hosi proposta orsamentu 2020 sei aloka ba ministériu no instituisaun sira iha setór Kapitál Sosiál, ho nia distribuisaun porsentu 9,5 ba edukasaun, porsentu 13 ba protesaun sosiál no porsentu 7,3 ba saúde.

Programa dahuluk no medida foun sira husi Kapitál Sosiál inklui halo uma ba veteranu, investimentu iha bee no saneamentu, konstrusaun sentru no postu saúde, konstrusaun torre tranzmisaun ba televizaun, sosa ambulánsia, konstrusaun eskola no sala aula no kontribuisaun ba seguransa sosiál.

Programa daruak mak dezenvolvimentu ekonómiku, investe iha ekonomia no finansa públika iha setór ida-ne’e maka atu fasilita investimentu setór privadu, kriasaun kampu serbisu no suporta setór agrikultura, Expo Dubai, subsídiu ba grupu kooperativa no subsídiu grupu feto iha área rurál.

Programa datoluk maka hadi’a Konetividade Nasionál mak hanesan infraestrutura no lojístika, sosa Ró Nakroman II no provizaun serbisu foun ba aviasaun sivíl.

Programa dahaat mak konsolidasaun no hametin defeza, seguransa, no relasaun esterna mak hanesan suporta polísia komunitária, suporta polísia fronteira, sosa ró patrollamentu hodi proteje fronteira marítima Timor-Leste nian.

Programa dalimak mak konsolidasaun no hametin justisa, demokrasia no direitu umanu iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here