Abitante sira nebe kumpri ona loron 14 iha kuarentena wainhira husik hela kuarentena Tasitolu hodi fila ba hamutuk ho sira nia familia, 30 Abril 2020.Imajen/TATOLI

DILI, 08  juñu 2020 (TATOLI)-Ministériu Saúde daudaun ne’e halo ona prosesu finalizasaun ba Commitment  Payment Voucher (CPV) husi kompañia fornesimentu hahán no Otél sira hodi halo ona pagamentu iha tempu badak.

Governu liuhosi Ministériu Saúde iha fulan rua liubá kontrata ona kompaña hamutuk  26 maka forñese hahán ba fatin kuarentena no izolamentu COVID-19 no Otél 25, inklui kompañia reabilitasaun kuarentena iha Tibar Liquiça, Motain Bobonaro, no Tasi-Tolu Dili.

Diretór Nasionál Planu Finansa Ministériu Saúde, Marcelo Amaral, hateten prosesu asina kontratu ho kompañia ramata ona, maibé mosu problema tékniku iha Diresaun Aproviziomantu liga ho CVP tanba ne’e maka atraza ba prosesu pagamentu.

Maibé tuir alvu katak iha semana ida ne’e bele halo ona pagamentu ba kompañia hamutuk 50-resin.

“Ha’u mós hetan orientasaun husi Vise Ministru Estratéjiku Dezenvolvimentu katak atu aselera pagamentu sira ne’e tanba parte finansa hein hela aprovizionamentu atu ami halo ona,” dehan Marcelo Amaral ba TATOLI,

Ho problema ne’e maka Diretór ne’e husu ba kompañia sira atu pasensia oituan hodi tulun Ministériu Saúde finaliza lalais prosesu ne’e durante semana ida ne’e.

Iha Parte seluk, Diretòr Aprovizionamentu Ministériu Saúde,  Bernadino da silva, esplika nia parte esforsu daudauk hodi finaliza prosesu CVP nune’e bele halo ona pagamentu ba kompañia sira.

“Atividade sira ne’e ita fahe ba faze rua entaun faze dahuluk mak ita ko’alia kona-ba pagamentu nian entaun ita liga liu ba izolamentu no kuarentena no daruak mak ba otél sira no fornesimentu hahán inklui mós preparasaun ba infraestutura báziku sira,” katak nia ba Jornalista sira iha ninia servisu fatin Caicoli.

Ministériu Saúde prevee ona osan hamutuk millaun $ 1.4 hodi selu otél no kompañia sira.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here