Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 08 juñu 2020 (TATOLI)-Governu liuhosi Ministériu Saúde daudaun ne’e prosesa ona proposta husi Instituisaun Ensinu Superiór Privada no Públiku hamutuk 18 ne’ebé husu apoiu ekipamentu prevensaun COVID-19 hanesan tanki bee moos no máskara hamutuk rihun 60.

”Ha’u haree ona pedidu husi Instituisaun Ensinu Superiór Privada no Públiku nian, sira husu apoiu tanki bee no máskara, ha’u halo fali proposta hodi no enkamiña ona ba Ministériu Saúde atu husu apoiu no tuir informasaun iha ona prosesu,” informa Ministru Ensinu Superiór Siénsia no Kultura (MESSK), Longuinhos dos Santos ba Agência TATOLI, iha Colmera Dili, segunda ne’e.

Tuir loloos pedidu IESPP ne’e refere ba MESSK maibé tanba laiha orsamentu hodi fó apoiu maka Instituisaun Governu ne’e kontinua haruka liubá Ministériu Saúde.

“Ha’u haruka ona ekipa tékniku husi Diresaun Nasionál Finansa nafatin tenta no rezultadu iha ona prosesu aprovizionamentu tanba presiza kumpre regra,”tenik Governante.

Aleinde haruka proposta ne’e ba Ministériu Saúde, Longuinhos mós tenik tan katak nia parte haruka mós pedidu IESPP nian ba Ministériu Turizmu no Komérsiu (MTK) hodi fó tulun.

Entretantu, Instituisaun Ensinu Superiór Privada no Públiku 18 ne’e maka hanesan UNTL, UNDIL, UNPAZ, DIT, UNITAL, IPB no seluk tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here