Kondisaun Ponte Becusse hafoin inundasaun ne’ebé akontese iha sesta (13/03). Imajen Tatoli/António Gonçalves

DILI, 08 juñu 2020 (TATOLI) – Ministru Obra Públiku, Salvador Eugênio Soares dos Reis Pires, hahú asina ona kontratu faze dahuluk ho kompañia hamutuk sia atu halo mobilizasaun ba rekuperasaun obra Estadu ne’ebé hetan estragu husi inundasaun iha fulan-marsu.

“Ekipa Task Force ita forma konsege hala’o levatamentu dadus no deside iha Konsellu Administrasuan Fundu Infraestrutura (KAFI) no kustu orsamentu ho baze dezeñu inklui Bill Of Quantity (BOQ) no konsege konklui ona. Tanba ne’e ohin ita asina kontratu ho kompañia sia atu ezekuta obra emerjénsia no mobilizasaun-an hodi halo rekuperasaun ba inundasaun ne’ebé akontese iha loron 13 marsu ne’e,” tenik Ministru Salvador hafoin asina kontratu ho kompañia sira iha edifísiu Diresaun Estrada no Ponte iha Comoro, Ministériu Obra Públika (MOP), segunda ne’e.

Ekipa Task Force estabelese bazeia ba despaisu husi Primeiru Ministru, Taur Matan Ruak, husi rezultadu enkontru ho KAFI, inklui entidade relevante sira hanesan Ajénsia Dezenvolvimentu Nasionál (ADN), Komisaun Nasionál Aprovizionamentu (CNA, sigla portugés) no Sekretariadu Grande Projetu (SGP) no mós ajénsia sira ne’ebé tutela iha MOP hanesan Diresaun Jerál Obra Públika, Servisu Água Saneamentu (SAS) inklui Eletricidade de Timor- Leste (EDTL).

Ekipa ne’e aprezenta obra Estadu ne’ebé hetan estragu husi inundasaun ne’e hamutuk 28, maibé hafoin ekipa legál interministeriál halo validasaun tuir Lei Aprovizionamentu artigu 92 no 94 katak iha risku ba saúde públiku no sanemanetu inklui movimentasaun públiku.

Tanba ne’e, husi totál fahe ba projetu 16 ne’ebé maka prense rekezitu sai projetu emerjénsia no projetu 12 tama ba prosesu normál tanba la prense rekezitu emerjénsia.

“Projetu emerjénsia 16 ne’e ho kustu millaun $8,8 no ninia prosesu selesaun husi kompañia sira ne’e bazeia ba orientasaun Primeiru-Ministru, ne’ebé hateten katak tenke iha rekursu finaseira, esperénsia no iha ekipamentu no rekursu umanu inklui temu ezekusaun tuir de’it eskalaun obra, ne’ebé balun fulan-lima no neen maibé tenke finaliza iha tinan ne’e,” nia subliña.

Tipu obra emerjénsia maka hanesan ponte My Friend, Becusse, Hera, retensaun ba barreira sira, estrada no hadi’a Eskola 5 de Maio, Sérgio Veira de Melo no obra seluk tan.

Ho nune’e, Governante ne’e enkoraja ba kompañia sira ne’ebé hetan fiar ona husi Governu atu ezekuta projetu ne’e tuir tempu ezekusaun ho kualidade hafoin Governu halo pagamentu.

“Ha’u husu atu imi (kompañia sira) ezekuta ho kualidade no agradese mós ekipa Task Force tanba konsege hala’o levantamentu dadus obra Estadu ne’ebé hetan estragu husi inundasaun,” Ministru agradese.

Iha seremónia ne’e partisipa husi Koordenadór ekipa Task Force no atuál Diretór Jerál Obra Publika, Rui Hernani, Diretór Ezekutivu CNA, kompañia sira no membru ekipa Task Force.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here