Ministru Ensinu Superiór, Siénsia no Kultura Longuinhos dos Santos. Imajen/Egas Cristovão

DILI, 08 juñu 2020 (TATOLI)-Ministéru Ensinu Superiór Siénsia no Kultura (MESSK) no Sekretáriu Estadu Arte no Kultura (SEAK), segunda ne’e hahú halo ona preparasaun ba proposta orsamentu jerál 2020.

Ministru Ensino Superiór Siénsia no Kultura (MESSK),  Longuinhos dos Santos  informa maski halo ona deskusaun maibé nia parte seidauk aprova montante ruma tanba seidauk simu tetu fiskál ne’ebé distribui husi Ministériu Finansa.

“Ohin ita seidauk define montante finál tanba ita sei hein hela tetu fiskál Orsamentu Jerál Estadu  2020 nian ne’ebé mak sei aloka husi Ministériu Finansa,”esplika Governante ne’e ba jornalista sira, iha Colmera Dili.

Deskusaun ne’e atu haree prioridade saida maka Ministériu Ensinu Superiór Siénsia no Kultura ho Sekretáriu Estadu Arte no Kultura sei implementa durante tinan 2020 to’o 2023.

Tuir Governante ne’e katak, MESSK iha planu prioridade haat no SEAK mós iha planu haat durante tinan tolu. Programa haat husi MESSK nian maka  konsentra ba infraestrutura sidade universidade Aileu, moderniza Institutu Politékniku Betano, implementasaun polítika padraun minimu, no programa bolsa estudu.

“Agora ba Arte no Kultura nian mak sei estabelese akadémika kultura indústria no kreativu, establese biblioteka nasionál, promove atividade kultura no prezervasaun kultura ikus mak promove biblioteka no muzeum,”tenik Longuinhos.

Ba 2020 MESSK sei implementa uluk mak aprovasaun ba polítika nasionál ensinu superiór, formasaun lian portugés, bolsa estudu ba estudante Timoroan iha rai-li’ur, no rekruta estudante foun tama UNTL no IPB.

No SEAK nian maka levantamentu dadus tais Timor-Leste hodi rejista iha UNESCO, no levantamentu dadus ba prezervasaun kultura liliu uma lulik iha territóriu Timor-Leste.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here