Seremónia asina entendimentu entre MAP no KITL iha salaun MAP, Comoro, segunda (08/06). Imajen Tatoli/Natalino Costa

DILI, 08 juñu 2020 (TATOLI) – Ministériu Agrikultura Peska (MAP) hamutuk ho Konservasaun Internasionál Timor-Leste (KITL) halo entendimentu ba matadalan observasaun animál protejidu iha tasi laran, hodi halo protesaun ba baleia, golfiñu, dugon no seluk tan, atu nune’e bainhira ema luku ba tasi labele estraga hodi sai objektu turístiku no bele hetan rendimentu.

“Ita asina matadalan ida ho Konservasaun Internasionál, atu nune’e bele sai matadalan ida bainhira ema ida luku hamutuk ho animál hanesan baleia no golfiñu bele tuir regra nune’e bele mantein sustentabilidade no labele halo animál ne’e sai fuik hodi ita bele hetan reseita husi atividade ida-ne’e,” dehan Diretór Jerál Peska, Acacio Guterres, hafoin seremónia asina entendimentu iha salaun MAP, Comoro, segunda ne’e.

Tuir Dirijente ne’e, akordu ne’e hanesan kontinuasaun ne’ebé tinan hirak liubá asina husi eis Vise-Ministru Agrikultura no Peska, Marcos da Cruz ho Konservasaun Internasionál maibé tanba prazu liu ona maka presiza kontinua akordu ne’e.

Objetivu husi entendimentu ne’e hodi konseva área peska ne’ebé akordu ne’e rasik dura tinan-rua no bainhira ramata sei renova filafali.

Tuir Acacio Guterres, animal hanesan baleia no golfiñu kada tinan iha fulan-setembru to’o novembru ba buka hahán iha tasi Antartika no bainhira halo produsaun sira tenke mai fali iha área tasi manas ka tasi trópika, tamba ne’e bele sai objektu hodi ema bele haree.

“Diresaun Nasionál Peska sei prepara ninian  implementasaun hanesan formatu bainhira ema hotu ne’ebé mai iha Timór atu ba luku hamutuk ho baleia no golfiñu, presiza mai rejista iha Diresaun Nasionál Peska hafoin ami orienta oinsá maka atu la’o. Nune’e mós, sei servisu hamutuk di’ak liután ho parte Komponete Navál hanesan ita-nia Polísia Marítima atu haree ba kestaun ida-ne’e,” nia akresenta.

Biban hanesan, Ministru Agrikultura Peskas, Pedro Reis, konsidera nota entendimentu ne’e sai hanesan matadalan ida atu MAP bele servisu di’ak liután iha futuru iha área peska.

“Importante tanba durante ne’e ita moris ho Dotasaun Ordamentu Temporáriu maibé espera katak entendimentu matadalan ne’e ami bele tau ona osan atu suporta atividade peska,” governante ne’e subliña.

Iha sorin seluk, Country Diretor KITL, Manuel Mendes, hateten parte rua asina dokumentu importante ne’e atu iha matadalan ba observsaun animál tasi laran ne’ebé konsidera protejidu.

“Eventu ne’e importante tebes atu nune’e ba oin Timor-Leste bele konserva di’ak liután ninia rikusoin iha tasi laran no bele regula, nune’e ba oin bele hetan rendimentu husi setór seluk, la’ós de’it ba mina maibé ita mos uza riku soin tasi nian hodi hetan rendimentu seluk,” nia subliña.

Maski nune’e, nia nota katak alokasaun orsamentu ba Diresaun Nasionál Peskas sei menus, tanba ne’e Konservasaun Internasionál sei servisu bamutuk ho Organizasaun Naun Govermentál (ONG) sira hodi ajuda Timor-Leste iha área ne’e.

“Konservasaun Internasionál sei kontinua kompromisu tomak apoiu Ministériu Agrikultura no Peska atu lori orsamentu barak husi rai-li’ur hanesan doadór sira husi setór privadu no públiku mai ita-nia rai,” nia realsa.

Nia haktuir, durante ne’e KITL konsege halo buat balun hodi ajuda Governu ba protesaun rikusoin tasi laran.

“Konservasaun Internasionál hahú ona dezenvolve mariña protejida. Ita halo hitu iha Parke Nasionál Nino Conis Santana, área protejidu mariña 12 iha Ataúro no agora daudaun ita halo tan haat iha parte Batugade to’o Atabae,” haktuir reprezentante KITL ne’e.

Intensaun idetifika área mariña protejidu hodi proteje di’ak liután rikusoin, nune’e bele iha sustentabilidade.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here