Labarik sira fase liman antes atu tama ba loja lider

DILI, 08 juñu 2020 (TATOLI)-Eskola Ensinu Báziku Sentrál Akadiruhun Bidau, daudaun ne’e instala ona tanki bee moos no torneira ba estudante ho profesór sira atu fase liman durante prosesu aprendijazen hodi kombate transmisaun moras coronavirus.

Diretór Eskola, Mateus Pinto Tilman, hateten nia parte antes ne’e instala ona tanki rua, torneira haat, sosa ona balde ualu, sabaun, aisar ualu, no seluk tan.

Maibé eskola ne’e sei presiza atu instala tan tanki ho kapasidade rai bee hamutuk litru 1100 inklui torneira lima hodi fasilita estudante 1400 ho profesór 46.

“Ami sosa ona ekipamentu sira ne’e husi osan konsensaun eskolár  $ 1.400, ami sei presija sosa tan tanki bo’ot ida ho kapasidade litru 1100 hodi instala tan iha ami-nia eskola atu nune’e bele halo prevensaun ida diak liutan,”tenik nia ba ajénsia Tatoli iha EBC Akadiruhun, segunda ne’e.

Kona-ba distansiamentu sosiál no fizíku, nia esplika sei enfrenta problema menus sala aprendijazen atu akumula totál estudante 1.400 tanba eskola ne’e iha de’it sala 14.

“Ami la hatene atu koloka estudante 1400 ne’e oinsá tanba ita-nia Ministra dehan fahe de’it ba grupu rua. Kada grupu ida, oras rua entaun sira seluk atu tau iha ne’ebé,” Mateus preokupa.

Nia dehan bainhira implementa desizaun Ministériu Edukasaun Juventude no Desportu hodi koloka estudante kada sala ema na’in 20 defisil atu akumula estudante 1.400 bainhira re-ativa ona prosesu aprendijazen.

“Kada sala iha de’it estudante 20 dividi ba sala 14 ne’e entaun hetan de’it estudante 160 pesoas no  fahe ba grupu rua konserteza estudante 320 mak sei hetan oportunidade hodi tuir matéria durante oras rua nia laran, agora estudante 1080 ne’e atu tau iha ne’ebé,”tenik tan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here