Portavóz CIGC, Odete Viegas. Imajen Tatoli/Egas Cristovão

DILI, 08 juñu 2020 (TATOLI) – Maski Governu deside taka ona fronteira terrestre durante Estadu Emerjénsia hodi evita propagasaun surtu COVID-19 husi nasaun viziñu tanba maioria kazu konfirmadu iha Timor-Leste konsidera hanesan importadu husi nasaun efetadu, maibé nafatin iha sidadaun sei tama ilegál.

Portavóz Sala Situasaun, Sentru Integradu Jestaun Krize (CIGC, sigla portugés), Odete Viegas, informa totál ema tama ilegál hahú loron 28 maiu to’o 8 juñu hamutuk na’in-27.

“Husi ema na’in-27, tama husi Batugade 12 ne’ebé na’in-sanulu tau iha kuarentena no na’in-rua deporta tanba hanesan sidadaun Indonézia, Salele Suai hamutuk ema na’in-neen ne’ebé na’in-tolu tama kuarentena no na’in-tolu deporta tanba la’ós timor-oan, iha Oé-cusse hamutuk ema na’in-ualu ne’ebé ema na’in-hotu tama husi Oésilo, Pásabe no Oelulan no ida hanesan sidadaun Indonézia ne’ebé deporta ona,” dehan Portavóz CIGC liuhosi Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Ema nain-ualu ne’ebé tama husi fronteira Rejiaun Administrativa Espesiál Oé-cusse Ambeno (RAEOA), na’in-haat halo servisu negósiu fa’an mina-rai, ne’ebé Unidade Patrullamentu (UPF) konsege idetifika no na’in-haat hanesan estudante timor-oan ne’ebé tama ilegál.

Antes ne’e, CIGC deklara husi hahú implementa Estadu Emerjénsia to’o 18 maiu, totál ema ne’ebé tama ilegál husi fronteira terrestre hamutuk na’in-110, ne’ebé husi totál ne’e, ema na’in-48 tama husi Fronteira Batugade, husi Fronteira Salele na’in-ualu, Fronteira Oesilo no Sakato hamutuk na’in-58.

Daudaun ne’e, ema iha kuarentena obrigatóriu hamutuk 58 no auto-kuarentena hamutuk 56, enkuantu ema ne’ebé kompleta ona loron 14 iha kuarentena hamutuk 2.397.

Iha loeon 21 marsu 2020, Timor-Leste rejista kazu pozitivu COVID-19 dahuluk ema na’in-ida no kazu ikus liu rejista iha loron 24 abríl, nune’e totál konfirmadu na’in-24 no provável na’in-haat.

Husi totál konfirmadu ne’e, na’in-22 rejista iha Dili enkuantu na’in-rua seluk rejista iha Munisípiu Liquiçá.

Iha loron 15 maiu, liuhosi Sala Situasaun, CIGC deklara pasiente konfirmadu no provável rekuperadu hotu ona no to’o ohin loron seidauk rejista kazu foun.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no tama mai Timor-Leste liuhosi dalan fronteira terrestre no aeroportu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here