Inspesaun konjunta entre AIFAESA, OMS no MS iha Loron Mundiál Ai-han Seguru. Dili, 07 juñu 2020. Imajen/Dok.Mídia-AIFAESA

DILI, 08 juñu 2020 (TATOLI) – Maski Autoridade Inspesaun Fiskalizasaun  Atividade Ekonómia Sanitaria, Institutu Públiku (AIFAESA,IP), apela ona ba operadór ekonómiku sira atu labele fa’an sasán liu prazu, maibé kontinua komete infrasaun iha sira ninia atividade.

Diretór Operasaun AIFAESA, Gabriel da Costa, hateten iha segunda ne’e parte AIFAESA sei bolu jerente Loja Dili Mart tanba komete infrasaun.

“Ami horisehik halo inspesaun iha Loja Dili Mart no hetan irregularidade ne’ebé maka loja ne’e komete hanesan sasán liu prazu maibé kontinua fa’an. Tanba ne’e, ami foti kedan  medida prosesu auto-notísia kontra ordensaun  bazeia  Dekretu-Lei númeru 3/2008 no Dekretu-Lei 2009, 5 agostu hodi prosesu tuir lei no sei bolu sira hodi presta deklasaun iha AIFAESA,” dehan Diretór Gabriel ba Agência Tatoli, via telefónika, segunda ne’e.

Nia haktuir, iha sábadu semana kotuk, ekipa AIFAESA halo inspesaun iha Dili Mart.

“Ami tama Dili Mart, hetan susu ben ida iha nia label hakarek dehan tenke tau iha konjeladór porsentu rua, maibé realidade  ita hare loja ne’e la tuir saida maka hakarek iha label produtu ne’e. Susu ben sira utiliza filafali iha konjeladór ho porsentu 22. Ida-ne’e tuir loloos labele tanba afeta ba ita-nia saúde públiku,” nia akresenta.

Tuir Jerente ne’e, karik iha prosesu maka hatudu katak empreza ne’e komete irregularidade duni maka sei selu multa $1.000 to’o $10.000.

Nune’e mós, AIFAESA iha fin semana ne’e kontinua halo inspesaun ba merkadu trandisionál Taibesi no identifika operadór ekonómiku sira fa’an produtu balun liu prazu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here