Amu Domingos Maubere ne'ebé akompaña husi autoridade Polísia haree estatua Na'in-Feto ne'ebé ema deskoñesidu baku-rahun, foin lalais ne'e. Imajen/Espesiál

DILI, 07 juñu 2020 (TATOLI) – Lider Karizmátiku, Kay Rala Xanana Gusmão, tuun diretamente ba haree kondisoens estátua Na’in-Feto ne’ebé ema deskoñesidu baku-rahun iha Gruta Ave Maria, Becora, Dili, foin lalais ne’e.

Notísia Relevante : Xefe Suku Becora La Tolera Aktu Ema Balun Estraga Estátua Nain Feto

Durante hala’o observasaun iha fatin akontesimentu, Xanana deklara nia sentimentu  triste no lamentavel tebes ho aktu ema balun nian ne’e.

Lider Karizmátiku, Kay Rala Xanana Gusmão, rei ho domin boot ba nia povu bainhira nia vizita ba Munisípiu Covalima, sesta (05/06/2020) Imajen/Eugénio Pereira

Xanana mós aprezenta nia duvida boot kona-ba oinsá mak ema bele tama ba gruta laran ne’ebé hale’u ho moru hodi foti sai Estátua husi Gruta laran.

“Ha’u foin primeira vés mak iha ne’e, se iha gruta ne’e Igreja iha oin, eskola iha kotuk, oinsá maka ema bele tama mai foti estátua ne’e,” Xanana deklara bainhira hamutuk ho komunidade balun ba observa fatin akontesimentu, domingu ne’e.

Nu’udar Sarani Katólika, Xanana triste liu tan tanba estátua Na’in-Feto  ne’e rahun iha rai ida ne’ebé maioria sarani Katólika.

“Ne’e la merese akontese. Se Na’in-Feto rai iha gruta laran, oinsá maka ema bele tama mai lori sai no ema ida la haree,” Xanana lamenta

Iha observasaun ne’e, Xanana mós preokupa kondisaun portaun Igreja ne’ebé seidauk halo dala ruma bele halo ema tama sai livre.

“Moru ne’e seidauk halo karik kalan ema bele tama sai livre,”  nia tenik.

Xanana mós motiva joven sira ne’ebé halo vizita, atu kontinua halo orasaun no devosaun ba Na’in-Feto hodi tulun nasaun no povu Timor-Leste husi kualkér dezastre.

Lider Karizmátiku ne’e espera, Polísia Nasionál Timor-Leste inklui autoridade Igreja sira, bele halo investigasaun kle’an  hodi deskobre lalais autór sira ne’ebé envolve iha aktu ne’e.

Estátua Nain Feto ne’e rasik agora Padre Igreja Becora, Domingos Maubere, foti ona hodi tau iha ninia rezidénsia.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here