Diretór Jerál Ministeriu Soliedariedade Sosial no Inkluzaun (MSSI), Rui Manuel Gago Exposto. Imajen/Nelson Sousa

DILI, 07 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto hateten, ohin, ekipa pagamentu dezloka ona ba Munisípiu 11 ezetu Rejiaun Administrativu Espesiál Oé-cusse Ambeno (RAEOA) hodi halo pagamentu subsídiu $200 ba agregadu familiár iha tersa-feira (09/06/2020) semana oin.

Notísia Relevante:  Governu Benefísia Uma-Kain 298.119 iha Munisípiu 12

,”Ohin, ita-nia ekipa pagamentu sira dezloka ba Munisípiu 11 ezetu RAEOA hodi halo pagamentu subsídiu $200 ba ita-nia benefisiáriu sira iha suku no aldeia iha Timor-Leste,” dehan Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, ba Agênsia TATOLI iha nia servisu fatin MSSI, Caicoli, Dili, domingu ne’e.

Diretór jerál MSSI ne’e hateten, tuir informasaun katak Xefe Suku sira balu komesa halo preparasaun fatin pagamentu no halo ona levantamentu para aban Banku Nasionál Komérsiu Timor Leste (BNCTL) transfere osan ba konta bankária Postu Administrativu nian, atu nune’e iha tersa-feira, hotu-hotu bele halo pagamentu ona.

“Aban BNCTL transfere ona osan ba Postu Administrativu ne’ebé besik iha sidade Munisípiu nian katak suku no aldeia sei simu uluk subsídiu uma-kain $200 hafoin kontinua fali aldeia no suku ne’ebé distánsia dook hosi sidade munisípiu nian,” nia dehan.

Aleinde ne’e, nia informa, ohin, totál karreta hamutuk 329 sei dezloka ba munisípiu. Hosi karreta hirak ne’e, karreta hosi Patrimóniu Estadu hamutuk 181 no karreta ne’ebé aluga hamutuk 148 mak sei tula ekipa pagamentu sira to’o iha munisípiu ne’ebé fahe ba kada aldeia no suku.

Nia hateten, funsionáriu MSSI nian balun iha munisípiu sira mak toma konta no haree ba preparasaun no distribuisaun osan ne’ebé mak prioridade liu iha ne’ebá, tanba kada munisípiu sira iha mós edifisíu MSSI.

“Tanba ne’e, ita-nia ekipa pagamentu sira hosi Nasionál ne’e ba taka de’it lakuna sira iha fatin pagamentu ne’e,” nia hateten.

Nia haktuir, kada ekipa pagamentu iha aldeia no suku mak Xefe Aldeia, Xefe Suku, Administradór Postu no Munisípiu inklui ho ekipa pagamentu sira hosi munisípiu nian no Nasionál.

Kona-ba naran sira, nia dehan, benefisiáriu sira ne’ebé mak naran la taka sai iha sede suku ka naran laiha sei iha opurturnidade hodi halo reklamasaun ba iha meza xefe suku nian hodi halo reklamasaun ba nia dadus.

“Bainhira sira halo reklamasaun ita sei nafatin konsidera mós no sira sei hetan subsidiu iha faze daruak nian,” nia esplika.

Notísia Relevante: Komunidade 80% Laiha Konta Bankaria, BNCTL Labele Halo Pagamentu Direta

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here