Diretor Jeral MSSI, Rui Manuel Gago Exposto

DILI, 07 juñu 2020 (TATOLI)–Governu liuhosi Diretór Jerál Ministériu Solidaridade Sosiál no Inkluzasaun (MSSI), Rui Manuel Gago Expostu, husu ba sidadaun (timoroan) sira iha Timor-Leste atu responsabiliza, garante seguransa no estabilidade hodi distribuisaun osan hosi Governu ida-ne’e bele finaliza ho susesu.

“Oinsá atu garante ita-nia subsídiu uma-kain $200 iha aldeia no suku, presiza sidadaun hotu-hotu iha Timor-Leste hodi halo seguransa no kria estabilidade hahú preparasaun, distribuisaun to’o ramata pagamentu ida-ne’e. La’ós ha’u mesak ka ekipa pagamentu de’it maibé ita hotu responsabiliza hodi pagamentu ne’e la’o ho di’ak no susesu,” dehan Rui Manuel Gago Exposto ba Ajénsia TATOLI iha nia knaar fatin MSSI, Caicoli, Dili, domingu ne’e.

Nia hatutan, subsídiu uma-kain ida ne’e Governu nia planu maibé bainhira sidaudaun laiha pás, estabilidade no garantia, hein katak buat hotu sei la’o ho di’ak.

Tanba ne’e, nia husu ba Xefe Suku sira atu kontribui pás no estabilidade iha momentu pagamentu ba benefisiáriu sira, presiza autoridade komunitáriu sira tanba ita-boot sira mak besik liu sidadaun iha aldeia no suku.

“Ho ne’e, ita husu atu Xefe Suku sira tenke kontribui pás no estabilidade nomós koordenasaun di’ak ho ita-nia komunidade sira atu hakbesik-aan ba fatin pagamentu hodi hetan subsídiu $200 hosi Governu,” nia hateten.

Nia husu ba Xefe Suku sira atu labele impede pagamentu liuliu atu labele impede fali sidadaun ka uma-kain ne’ebé naran sai atu simu osan enkuantu uma-kain balun seluk naran laiha.

Tanba, tuir nia, sidadaun presiza duni atu xefe suku sira nesesita sira-nia nesesidade liuhosi subsídiu uma-kain , tanba ne’e presiza koordena ho xefe família ne’ebé naran la sai atu halo reklamasaun hodi bele hetan nia direitu iha faze daruak nian,” nia dehan.

Notísia Relevante: Ohin, Ekipa Pagamentu Subsídiu $200 Dezloka ba Munisípiu

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here