Xanana halibur populasaun sira iha Covalima, sábadu (06/06/2020). Imajen/Eugénio Pereira

COVALIMA, 06 juñu 2020 (TATOLI)- Komandante Ein-Xefe FALINTIL, Kay Rala Xanana Gusmão, hasai  nia osan privadu hodi ba halo kompras direta ba sasán kontrasaun hanesan, kalén hamutuk 120 no besi kotak boot  (baja ringan) 10 hodi ajuda harii Uma Mahon ka Vulneravel Person Unit (VPU) Komandu Polísia Munisípiu Covalima nian.

Notísia Relevante : Xanana Promete Reabilita Eskuadra Polísia Becora

Xanana haku’ak inan feton Covalima sira ho domin boot. Imajen/Eugénio Pereira

Apoiu materiál konstrusaun ne’e, Xanana oferese, hafoin hala’o vizita diretamente ba haree kondisaun VPU ne’ebé harii husi uma tali tahan ne’ebé konstrui husi Parseiru Dezenvolvimentu Nova Zelándia iha 2019 liubá, ne’ebé nia kondisaun komesa lahuk ona, no iha tempu udan bee tama edifísiu laran hodi estraga materiál serbisu.

Xanana dehan, apoiu ne’e hodi tulun ekipa VPU bele fasilita serbisu PNTL nian hodi fó asisténsia ba feto no labarik sira ne’ebé sofre kazu violasaun seksuál no violénsia doméstika.

“Apoiu ne’e importante tebes, tanba polisia mak halo serbisu hodi fó asisténsia liu-liu atu tau matan ba feto no labarik sira ne’ebé sofre iha violénsia bazeia ba jéneru,” Xanana hateten, ohin,  bainhira fó apoia material konstrusaun ba Eskuadra Komandu PNTL Covalima iha Covalima.

Iha fatin hanesan, Komandante Polísia Munisípiu Covalima, Superintendente António Mária de Sá, hato’o agradese tebes ho apoiu lider karizmátiku  hodi ajuda ona PNTL Covalima.

“Ami agradese tebes ba Maun Boot Kay Rala Xanana Gusmão nia vizita mai haree hodi fó kedas apoiu, tanba uma mahon ne’e nia funsaun atu haree kazu violénsia doméstika no kazu abuzu seksuál ba menoridade sira sempre buka solusaun,” Komandante António de Sá hateten.

Nia dehan, ba kazu sira ne’ebé tama kategoria krime, VIP sempre halo prosesu investigasaun hotu aprezenta ba Ministériu Públiku hodi prosesa tuir lei.

Iha tinan 2020 nia laran, VIP rasik rejista kazu rua, agora daudaun ninia prosesu sei iha hela faze investigasaun ba vítima inklui suspeitu.

Nia dehan, PNTL kontinua koopera mós ho organizasaun feto sira ne’ebé luta no tau matan ba feto sira ne’ebé hasoru violénsia no abuzu seksuál hodi sosializa programa prevensaun ba krime violasaun seksuál no krime sira seluk ba iha komunidade sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here