Xanana Gusmão vizita Uma Dato Babolu, Suku Matain, Covalima, sábadu (06/06/2020). Imajen/Eugénio Pereira

COVALIMA, 06 juñu 2020 (TATOLI) – Lider Karizmátiku, Kay Rala Xanana Gusmão, louva ho asaun karidade husi Organizasaun Alimenta Ho Fuan (OAHF) no Asosiasaun Estudante Juventude Suai (AEJS)  ne’ebé kolabora malu  hodi fó apoiu nesesidade báziku  ba populasaun  ne’ebé moris situasaun mukit nia laran.

Notísia Relevante : Xanana Apela ba Juventude ho Veteranu Hakmatek no Kontribui ba Pás

Xanana Gusmão, louva ho asaun karidade husi Organizasaun Alimenta Ho Fuan (OAHF) no Asosiasaun Estudante Juventude Suai (AEJS). Imajen/Eugénio Pereira

Xanana konsidera asaun solidariedade ne’ebé OAHF no AEJS hala’o importante tebes, tanba sira tuun direita ba terrenu koordena ho autoridade suku buka identifika povu kbiit-laek ne’ebé la iha forsa, no la iha osan no menus ai-han.

“Imi maka tenke sai ezemplu haree ferik sira, katuas sira, ema ho defisiénsia ne’ebé la iha kbiit, imi tenke fó apoiu sai ezemplu fali ba joven husi munisípiu seluk,” afirma  Xanana Gusmão, ohin, iha ámbitu hamutuk  ho grupu rua ne’e inklui setór privadu fó apoiu ai-han ba populasaun sira iha  Aldeia Kunain, Suku Matai, Postu Administrativu Suai-Vila, Munisípiu Covalima.

Iha fatin hanesan, Koordenadora Organizasaun Alimenta Ho Fuan, Natalia Sarmento, hateten durante periodu Estadu Emerjénsia (EE) sira fó ona apoiu ba povu kbiit-laek besik 150 iha Dili, Manufahi ho Covalima.

Grupu ne’e estabelese ho objetivu atu buka ajuda ema ne’ebé susar no menus ai-han durante Estadu Emerjénsia hodi luta hasoru propagasaun surtu Coronavirus  ka COVID-19 ne’ebé ameasa iha Timor-Leste.

Koordenadór Asosiasaun Estudante Juventude Suai (AEJS), Osvaldo dos Santos Coli, agradese ho mensajen Lider Karizmátiku, Xanana nian ne’e nu’udar  motivasaun ba sira atu kontinua halo asaun karidade ba povu kbiit-laek sira.

“Ami agradese tebes, Maun Boot bele mai hamutuk ho ami, no emprezáriu inklui intelektuál Covalima-oan hodi ajuda povu iha situasaun susar nia laran,” tenik nia.

Populasaun Aldeia Kunain, Suku Matai, ne’ebé pertense ba Postu Administrativu Suai-Vila hamutuk na’in-76 ne’ebé simu apoiu ai-han ne’ebé entrega direita husi Xanana hato’o agradesimentu boot ba ekipa tomak liuliu Xanana ne’ebé hatudu nia domin boot ba povu durante situasaun difisil ida ne’e.

Hafoin fó apoiu ba populasaun Suku Matain, iha tempu kalan, Xanana mós uza nia osan privadu hodi kontinua kompras foos, mina, supermie, sanan, no sasán nesesidade báziku seluk tan hodi fó apoiu ba ferik no katuas iha Suku Camanasa na’in-56 kompostu husi aldeia tolu hanesan, Ailok-Laran, Fatisin no Manekin.

Vizita Uma Lisan Dato Babulo

Iha ámbitu vizita  Xanana Gusmão ba Cocalima ne’e, aproveita hodi vizita mós ba Uma Dato Babulu,  hodi bolu atensaun nafatin ba foin-sa’e sira atu respeita kultura nu’udar identidade tradisionál ida ne’ebé Timoroan sira adora, tane-aas hodi hetan matak-malirin.

Tuir Xanana, uma lulik hanesan mós instituisaun ida sosiál hamriik iha kultura Timor-Leste nia klaran ne’ebé iha relasaun ho buat barak. Tanba lisan ne’e labele define de’it liuhusi relasaun ho família, ekonomia, ukun ka fiar, maibé lisan hanorin mós dame no toleránsia ba malu.

“Iha uma lulik ne’e, ita husu no bolu atensaun nafatin atu harohan no adora oinsá foin-sa’e ne’e hamutuk nafatin kria dame, tanba ita lisan ne’e hanorin buat barak ba ita, oinsá fiar no adora no respeita malu labele halo buat arbiru,” Xanana afirma tan.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here