Sorghum ka Batar Kay Rala tonelada 235 maka rai hela iha Sentru MOKATIL Covalima Vila. Imajen/Eugénio Pereira

COVALIMA, 06 juñu 2020 (TATOLI) – Lider Karizmátiku, Kay Rala Xanana Gusmão, dezafia membru Movimentu Kamponeza Timor-Leste (MOKATIL) Munisípiu Covalima, atu badinas kaer serbisu hodi hasa’e produsaun ai-han, liuliu kontinua kuda sorghum ka batar Kay Rala iha rai ne’ebé mamuk.

Notísia Relevante : SEKoop Entrega Mákina Prosesamentu Sorghum Unidade 152 ba MOKATIL

Xanana Gusmão konversa ho membru MOKATIL Munisípiu Covalima. Imajen/Eugénio Pereira

“Imi nafatin organiza malu ho povu kuda nafatin batar Kay Rala ne’e sai barak, atu ne’e, imi bele responde ba sitasaun hamlaha ne’ebé ita nia povu enfrenta, imi mós bele fó apoiu, mezmu ki’ik, importante imi fó imi nia apoiu,” hateten Xanana, ohin, iha ámbitu vizita ba Sentru MOKATIL, Covalima.

Iha fatin hanesan, Koordenadór MOKATIL Covalima, Luis de Araújo, informa  daudaun ne’e membru MOKATIL besik 300-liu, halo ona koleta ba  batar Kay Rala tonelada 235 maka rai ona iha armazein MOKATIL nian.

“Daudaun ne’e ita iha ona  Batar Kay Rala tonelada 235  maka rai dadaun iha Sentru  ne’e, no falta  157 tonelada  mak seidauk tula mai, tanba situasaun COVID-19 no batar ne’e balun sei rai hela iha ita nia toos Zumalai no Dais, Tilomar no fatin seluk tan, tanba transporte mínimu,” informa Luis durante aprezenta relatóriu ba Xanana.

Batar ne’ebé sira koleta ona iha primeira faze sei fa’an ba merkadu para bele hetan osan hodi sustenta fali membru sira. Nune’e batar sira ne’ebé kuda ona iha segundu etapa, sei koleta iha tempu besik, bainhira situasaun COVID-19 rekupera ona.

Nia husu ba Xanana atu fó apoiu nafatin tratór liman nian hodi fila rai sira ne’ebé mamuk para kuda nafatin batar ne’e. Tanba MOKATIL Covalima rasik husi ajuda tratór ba Ministériu Agrikultura no Peska (MAP) la fó, tanba konsidera MOKATIL organizasaun ketak.

“Ami nia laran moras tebes, ami husu ba MAP atu fó apoiu tratór, maibé sira dehan ami ne’e organizasaun ketak sira labele fó apoiu,” nia lamenta.

Nia hatutan Covalima iha potensiál boot tebes no iha rai luan presiza tratór atu apoia  MOKATIL hasa’e produsaun ai-han no ajuda povu sira labele menus ai-han.

Responde ba preokupasaun ne’e, Xanana promote sei fó apoiu tratór,  maibé importante MOKATIL uza lai mákina ne’ebé iha ona hodi prodús no kuda nafatin batar.

Durante vizita hodi haree sorghum ka batar Kay Rala  ne’ebé MOKATIL koleta, Xanana fó apoiu mós simente saka 50 ba ekipa MOKATIL hodi konstrui fatin tau tratór ninian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here