UPF halo operasaun iha liña fronteira terrestre. Imajen/Eugénio Pereira

COVALIMA, 06 juñu 2020 (TATOLI)-Atu prevene transmisaun surtu COVID-19 foun mai Timor-Leste, Ministériu Saúde sujere ba Ministériu Interiór no Ministériu Defeza atu reforsa liután seguransa bá iha liña fronteira terrestre entre Indonézia no Timor-Leste tanba konsidera risku no fasil atu ema ultrapasa ho dalan ilegál.

Diretóra Jerál Prestasaun Saúde, Odete Viegas da Silva, hato’o asuntu ne’e hafoin halo observasaun diretemente bá Fronteira Terrestre Mota-Masin, Covalima iha sábadu ne’e.

“Agora daudaun ita haree mota ne’e iha sorin ema nian entaun risku boot ba ita-nia ra’in se ita nune’e mak ema ruma moras hakat liu mai lori risku boot ba ita no sei mosu moras COVID-19 ne’e bainhira ita la reforsa servisu vijilánsia iha área fronteira nian,” informa Diretóra Jerál Ministériu Saúde ne’e.

Tuir ninia opiniaun, Ministériu tutela iha área seguransa presiza atu monta ekipamentu elektrónika hanesan CCTV nune’e fasil atu deskobre atividade ilegál no ema tama sai la tuir dalan legal sira.

“Ho ekipamentu eletróniku sira ne ami hanoin hamutuk ho parseiru sira atu bele dezenvolve ekipamentu ne’e iha Suai, Maliana atu ajuda vijilánsia sira para bele hetan ema sira tama ilegál hodi hatama sira ba iha kuarentena,” tenik Odete.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here