Joven ida leba nia sabaraka halo hela transaksaun ho konsumidores sira iha estrada ibun area kolmera Dili, 15 Maiu 2017.Aktividades joven sira involve liu-liu iha kapital Dili iha vida negosiu hodi ajuda sustenta sira nia Familia. Foto TATOLI

DILI, 05 juñu 2020 (TATOLI)–Koordenadór Ekipa Pastorál COVID-19 Arkedioseze Metropolitana Dili, atuál Reitór Semináriu Menór Nossa Senhora de Fátima Balide, Padre Angelo Salsinha hateten, durante estadu emerjénsia ba dala tolu tutuir malu, ekipa pastorál ne’e aprende lisaun barak hosi ai-leba sira.

Notísia Relevante: Arkedioseze Díli Apoia Família 7.000-Resin Durante Situasaun COVID-19

Padre Angelo hatutan, lisaun hosi ai-leba sira mak bainhira ekipa ne’e oferese sasán neseidade báziku ba sira maibé sira sempre husu katak fós ne’ebé sira simu mai-hosi ne’ebé no atu fó ho intensaun ruma karik, keta iha intensaun ruma hodi muda sira-ninia relijiaun ka prinsipiu karik.

“Lisaun barak hosi ai-leba sira, esperiénsia durante distribuisaun ne’ebé ita halo, katak bainhira ekipa ne’e tun to’o iha terrenu atu entrega, ita-nia família ai-leba sira sei husu. Apoiu ne’e tanbasá. Keta halo iha interese relijiaun nian karik. Keta tanba interese partidu karik. Sira sei husu maski sira hamlaha hela,” Padre Angelo haktuir ba Ajénsia TATOLI iha Balide, sesta ne’e.

Nia dehan, hosi lisaun ne’e atu dehan katak povu ne’e matenek tanba maski nia hamlaha, nia terus, nia la’o husi dook mak tun mai Dili atu buka moris, ema oferese apoiu ba nia mós nia sei husu tan keta iha interese ruma karik.

“Ita fó ba, nia haree katak  ninia dignidade aas liu fali hahan. Nia konsidera ninia situasaun ki’ak ne’e hola aparte iha ninia moris. Tuir loloos ita fó ba ne’e nia kontente no nia simu de’it. la presiza husu tan. Maibé, estraórdinariu ne’e mak ida nia husu ne’e. Ne’e hatudu katak ema ne’e iha duni dignidade, simplisidade, haraik-aan, pasiénsia, no kontente ho buat ne’ebé iha. Ezemplu boot ida ne’e mak ita presiza kuda iha timoroan sira-nia fuan,”, Amululik ne’e husu.

Hosi esperiénsia ne’e mós, Padre Angelo halo reflesaun ida katak situasaun sira hanesan ne’e sai hanesan mós edukasaun ida ba povu ida-ne’e, atu dependente ba buat ne’ebé  fahe.

Maibé, tuir nia, situasaun krize sira halo povu ne’e  komprende di’ak liután kona-ba moris ne’e, hanorin povu kona-ba oinsá servisu atu hetan hahan liuhosi liman fuan sanulu ne’ebé Maromak fó. Ida-nee hanesan kultura di’ak ida iha situasuan sira hanesan ne’e.

Lisaun seluk tan hosi komunidade enjerál mak, Padre Angelo nota katak povu Timor iha solidariedade ne’ebé aas tebes no diferente tebes ho ema hosi rai seluk.

“Durante ne’e, ita haree katak grupu ida-idak, sarani ida-idak, leigu sira, família ida-idak iha ninia inisiativa rasik hodi tulun malu. Ida-ne’e hanesn forsa boot ida no ita hanoin katak, iha rai seluk la halo hanesan ita-nia povu ida-ne’e halo perante situasuan krize sira. Mentalidade ida-ne’e mak presiza kultiva no mantein konserva,” nia hateten tan.

Tanba ne’e, Padre Angelo hato’o parabens ba povu Timor ho razaun krize sira ne’ebé durante ne’e la’o mai to’o surtu COVID-19 ne’e, halo povu ne’e aprende barak liután, buat barak ne’ebé halo povu tauk, rende, ho buat sira ne’e hotu hetok halo povu ne’e maduru liután iha moris ne’e.

“Ho situasuan impase politika no COVID-19, mai ita rona malu, moris nafatin iha disiplina tuir mensajen hosi kualker instituisaun, liuliu Organizasaun saude Mundial nian. Rona ita-nia nai ulun sira. Respeita malu. Tulun malu. Respite regra. Apoiu malu nafatin atu ema labele mate tanba tauk, halmlaha, no mate tanba moras. Maibe, ema hotu tenke sente hanesan maun-alin, iha forsa koletiva no pesoal, konfiansa boot liu ba Maromak ho buat hotu ne’ebémak ita iha nune’e vida ne’e sai hanesan bensaun no grasa ba ema hotu,” Bibi-atan ne’e hato’o lia menon.

Entretantu, ekipa Pastorál COVID-19 Arkediseze Metropolitana Dili, apoia ona família 7.000 resin, ne’ebé kuran ai-han, durante situasaun Corona Virus (COVID-19), no períudu estadu emerjénsia datolu ne’e.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here