Prezidente Komisaun Funsaun Públika, Faustino Cardoso Gomes. Imajen Tatoli/Egas Cristovão

DILI, 05 juñu 2020 (TATOLI) – Primeiru-Ministru (PM), Taur Matan Ruak konvoka reuniaun ho instituisaun relevante hanesan Komisaun Funsaun Públika (KFP), Institutu Nasionál Administrasaun Públika (INAP) no Institutu Defeza Nasionál (IDN) hodi orienta prepara estratejia kapasita funsionáriu Estadu sira hodi serví públiku no Estadu di’ak liután.

“Ami hasoru malu ho Primeiru-Ministru hodi halo diskusaun, esplora ideia, no buka dezeña estratejia atu tempu oin mai hala’o programa formasaun inteiradu ba funsionáriu públiku sira no mós entidade relevante, liuliu sira ne’ebé tama kategoria servidór públiku. Enkontru ne’e ami foin rona orientasaun husi Primeiru-Ministru kona-ba polítika ba futuru no tempu oin mai ami sei buka operasionaliza liután liuhosi enkontru sira atubele realiza,” relata Prezidente KFP, Faustino Cardoso Gomes hafoin enkontru Xefe Governu iha Palásiu Governu, sesta ne’e.

Faustino informa, formasaun ne’ebé sei hala’o ho tipu hametin liután konsiénsia no sentidu Estadu.

“Atu hametin liután karatér ne’ebé di’ak nu’udar sidadaun ho konsiénsia no sívika a’as inklui responsabilidade, nune’e bele kontribui hametin estabilidade nasaun, funsionamentu Estadu no fó prestasaun servisu di’ak liután ba interese públiku nian,” nia akresenta.

Tuir Prezidente KFP, durante ne’e formasaun ba funsionáriu públiku sempre iha, tanba tuir lei funsaun públiku katak kada funsionáriu públiku tinan-ida iha direitu oras 40 atu hetan formasaun tantu iha rai-laran no rai-li’ur.

“Formasaun hodi hatán ba polítika foun Governu nian, ami mós halo planu integradu ba oin iha ámbitu defeza nasionál, funsaun públiku no mós iha ámbitu dezenvolve kareira profísional funsionáriu públiku nian,” nia akresenta.

To’o fulan-dezembru 2019 funsionáriu, públiku permanente no ajente administrasaun públika bazeia ba rejime kontratasaun hamutuk 33.031, hosi númeru ne’e la sura ho funsionáriu kontratadu no kazual sira ne’ebé durante ne’e Governu selu ho orsamentu kategoria bens no servisu,

Totál funsionáriu kazuál daudaun ne’ehamutuk 6.000.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here