Ministru Asuntu Parlamentár no Komunikasaun Sosiál, Francisco Jerónimo hamutuk ho Sekretáriu Estadu Komunikasaun Sosiál, Merício Juvinal dos Reis ‘Akara’ vizita edifísiu Agência Tatoli, Farol, no simu husi Prezidente Tatoli, José Costa no Vise-Prezidente, Manuel Pinto no Olandino Costa, sesta (05/06). Imajen Tatoli/Egas Cristóvão

DILI, 05 juñu 2020 (TATOLI) – Ministru Asuntu Parlamentár no Komunikasaun Sosiál, Francisco Jerónimo, hamutuk ho Sekretáriu Estadu Komunikasaun Sosiál, Merício Juvinal dos Reis ‘Akara’, hala’o vizita ba edifísiu Agência Noticiosa de Timor-Leste, Tatoli,IP iha Farol hodi haree kondisaun servisu.

Vizita ne’e, simu husi Prezidente Agência Tatoli, José Costa, Vise-Prezidente Asuntu Jornalístiku, Manuel Pinto no Vise-Prezidente Asuntu Administrasaun, Olandino Costa, inklui hetan partisipasaun másimu husi funsionáriu tomak.

Iha sesaun dada-lia, governante rua ne’e simu rekomendasaun no preokupasaun husi dirijente redasaun sira hanesan regulamentu internu ne’ebé to’o agora iha ona esbosu maibé seidauk formaliza, prezervasaun notísia nu’udar dokumentu Estadu hodi bele iha memória institusionál, asesu ba dokumentu ofisiál Estadu nune’e nu’udar mídia Estadu bele sai referénsia no seluk tan.

“Durante ami servisu kuaze tinan-haat nia-laran, ami seidauk iha regulamentu internu, tanba husi regulamentu ne’e maka bele define ami-nia pozisaun iha kontratu, tantu ba diretora, kargu xefia, no editór sira, ami-nia pozisaun la refrete iha kontratu,” tenik Diretora Ezekutiva Agência Tatoli, Rita Almeida.

Aleinde ne’e, Vise-Prezidente, Manuel Pinto, hato’o ambisaun Agência Tatoli, ne’ebé hakarak priense multi-kanál ba mídia online ne’e hanesan vídio, audio, no gráfiku, nune’e atu realiza kestaun hirak ne’e tuir nia presiza iha rekursu umanu no infraestrutura ne’ebé bele suporta.

“Ami hanesan mídia online bele ameasadu tuir evolusaun tanba ezisténsia mídia online barak ho de’it ligasaun internet, tanba ne’e ami presiza iha multi-kanál hodi bele kobre husi parte oin-oin, nune’e bele disemina informasaun liuhosi plataforma hotu,” nia dehan.

Hatan ba preokupasaun hirak ne’e, Ministru Francisco Jerónimo, hateten nu’udar Membru Governu foun ne’ebé tutela iha área komunikasaun, nia sei rejista kestaun hirak ne’e hodi lori ba diskusaun ezekutivu.

“Ha’u sei defende ita bo’ot sira nia preokupasaun no ha’u husu ona ba Prezidente no Vise-Prezidente sira, ita bo’ot sira hamutuk hodi tau preokupasaun ne’e iha planu orsamentu 2020, nune’e semana oin mai ha’u bele deskute ona no submente ba Konsellu Ministru. Nune’e mós ha’u no Sekretáriu Estadu Komunikasaun Sosiál sei defende ida-ne’e iha aprezentasaun orsamentu 2020 iha Parlamentu,” tenik governante ne’e iha Salaun Borja da Costa, Agência Tatoli, Farol, sesta ne’e.

Aleinde ne’e, nia konsidera importante mós atu dezenvolve infraestrutura mídia Estadu.

“Ha’u mós iha prioridade rua, ida maka harii edifísiu ba mídia Estadu sira tanba presiza iha kondisaun ne’ebé di’ak atu halo servisu no seluk maka harii torre televizaun nune’e populasaun hotu iha área remota bele asesu informasaun ne’ebé kanaliza liuhosi Rádiu Televizaun Timor-Leste, Empreza Públika (RTTL,EP) di’ak liu tan,” nia akresenta.

Iha fatin hanesan, Sekretáriu Estadu Akara defende Agência Tatoli bele jere rasik ninia orsamentu tamba durante ezisténsia to’o agora, orsamentu mídia Estadu ne’e tama iha verba transferénsia públika Sekretaria Estadu Komunikasaun Sosiál (SEKOMS).

“Ha’u sei defende hodi imi bele haree osan rasik, se lae imi hakarak halo buat ida tenke lori ba ha’u hodi asina, ne’e ha’u lakohi,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here