Sekretáriu Estadu Ambiente, Demétrio do Amaral de Carvalho kuda ai-oan hodi selebra Loron Internasionál Ambiente. Imajen/Mídia-SEA

DILI, 05 juñu 2020 (TATOLI) – Iha loron 05 maiu kada tinan, mundu tomak inklui Timor leste Komemora Loron Internasionál ba Ambiente no tinan ne’e tema ne’ebé foti maka “Tempu ba Natureza” ho úniku xave mak sidadaun sira tenke kuidadu ambiente ba moris iha natureza moos.

Sub-tema ba selebrasaun tinan ne’e maka harii infrastrutura esensiál sira hanesan rikusoin iha tasi okos, tasi laran, tasi ibun, beleza naturál iha tasi no rai mak kapitál ekolojia importante ne’ebé bele nakfilak ba kapitál monetáriu hodi hametin infraestutura esensiál sira.

Iha selebrasaun ne’e, Sekretaria Estadu Ambiente (SEA) hala’o atividade kuda ai-oan iha Mota Maloa, besik Palásiu Prezidente no hala’o lansamentu fábrika resiklajen plástiku husi Kompaña Caltech ne’ebé servisu hamutuk ho Mercy Coorps no mós ajensia dezenvolvimentu seluk iha Beduku, Comoro.

Sekretáriu Estadu Ambiente, Demétrio do Amaral de Carvalho, hateten presiza tan ema barak atu  tau matan ambiente Timor-Lestre, liuliu reforsa ba kampaña no sensibiizasaun ba sidadaun tomak hanesan esforsu no asaun hodi hadi’ak ambiente.

“Iha loron ne’e, kuaze populasuan millaun 1,3 halo reflesaun hodi kuida ambiente, inklui ita iha Timor-Leste atubele moris iha natureza ida moos, matak no saudável atu jerasaun foun mai, hanesan ita-nia bei-oan sira ne’e mai simu Timor-Leste ida buras,” tenik Sekretáriu Estadu Demétrio hafoin lansa fábrika transformasaun lixu ba materiál konstrusaun iha Beduku, Comoro, sesta ne’e.

Tuir governante ne’e, selebrasaun loron ne’e nu’udar asaun aproriadu tebes ho tema sentrál Timor-Leste ne’ebé tenke harii infraestutura esensiál sira hodi kombate lixu sira no husu konsiénsia sidadaun sira-nia atu labele sunu no tesi rai arbiru.

Loron ambiente tinan ida ne’e, nia dehan tempu ba atu haree ba natureza tanba nota katak mundu ohin loron ne’e ameasa ba pandemia COVID-19 maihusi asaun ne’ebé ladún kuida ambiente.

Nune’e, nia husu ba sidadaun sira ne’ebé hela iha foho leten no hela iha kapitál sira atu kuida ambiente liuhosi asaun labele sunu rai, tesi ai no soe lixu arbiru.

“Ha’u-nia mensajen ne’e ho ha’u-nia fuan laran tomak, fó hanoin ba ita bo’ot sira labele sunu rai no tesi ai arbiru tanba aktu ne’e hanesan krime ambientál,” nia akresenta.

Demétrio felisita sidadaun hotu ne’ebé kontribui ona asaun ki’ik to’o boot, hodi kuida ona ambiente iha foho liuhosi kuda ai no la sunu rai no tesi ai arbiru.

“Se ita bo’ot sira kontinua sunu rai, ita sei halo medida importante tebes atu ema bele halo investigasaun no kriminaliza tanba kontra lei ambientál,” nia alerta.

Haktuir iha kódigu penál artigu 215 to’o 221 hateten katak ema ne’ebé ho intensaun sunu floresta no ai-laran sira konsidera hanesan krime ne’ebé bele hetan pena singulár no penalizasaun $5.000 inklui hetan kastigu tinan-tolu.

Husi aspektu reguladór, Sekertáriu Estadu ne’e salienta, Konsellu Ministru aprova ona Dekretu-Lei Eleminasaun, Produsaun, Importasaun ba Plástiku uzu úniku no hein Prezidente Repúblika promulga atu kombate lixu plástiku iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here