Sekretáriu Estadu Komunikasaun Sosiál, Merício Juvinal dos Reis ‘Akara’ dada lia ho mídia nasionál sira hafoin hala’o vizita ba Rádiu Komunidade Comoro, sesta (05/06). Imajen/Mídia-SEKOMS

DILI, 05 juñu 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’ halo vizita kortezia ba Rádiu Komunidade Comoro hodi haree kondisaun, nune’e bele hadi’a divulgasaun informasaun ba komunidade sira.

Tuir governante ne’e, vizita ne’e nu’udar kontinuasaun ba vizita antes ne’e iha Rádiu Komunidade seluk to’o munisípiu, no nia parte nota presiza moderniza sistema rádiu.

“Ho vizita kortezia ida-ne’e, ha’u reafirma pozisaun Governu nian katak sei apoia Rádiu Komunidade sira hodi dezenvolve sistema analog ba dijitál,” dehan Akara iha Rádiu Komunidade Comoro, sesta ne’e.

Nia konsidera, asuntu ne’e tama ajenda Governu tanba tempu agora hanesan era dijitál maibé rádiu iha Rai-laran atrazadu oituan tanba sei uza sistema analog.

“Tanba ne’e maka Governu sei apoia no ami hein jestór sira nian planu prioridade, nune’e iha tempu besik Governu atu aprezenta fali Orsamentu Jerál Estadu 2020 ne’ebé bele inklui apoia orsamentu ba Rádiu Komunidade sira,” nia akresenta.

Akara promete tempu seluk bele mai halo diálogu di’ak liután ho autoridade Suku Comoro rasik, inklui jestór Rádiu Komunidade sira atu deskute kle’an kona-ba dezenvolve Rádiu Komunidade ho di’ak.

“Oinsá ita hotu bele kolabora disemina informasaun ne’ebé maka kredível, ne’ebé presiza parte hotu nia kontribuisaun hodi kombate hoax no informasaun falsu ne’ebé maka la’o lemo-lemo iha ita-nia komunidade nia le’et ne’ebé halo pániku, hafoin ita-nia komunidade konsume fali lia falsu sira. Ida-ne’e ha’u sei buka tempu hodi halo diálogu kle’an liu tan,” nia subliña.

Iha semana kotuk, Sekretaria Estadu Komunikasaun Sosiál (SEKOMS) lansa rádiu streaming ba estasaun Rádiu Komunidade neen.

“Ita-nia komunidade la’ós iha Dili de’it maibé iha foho mós bele akompaña Rádiu Komunidade, liuliu ita-nia sidadaun sira iha hanesan Inglatera no Korea bele akompaña ona,” Akara salienta.

Iha fatin hanesan, Jestór Rádiu Komunidade Comoro, Natalino Fernandes Ximenes, apresia vizita ne’e hodi haree situasaun reál ne’ebé maka Rádiu Komunidade Comoro infrenta.

“Dezafíu boot ne’ebé maka ami infrenta maka edifísiu, tanba iha de’it espasu ki’ik inklui mós fasilidade ne’ebé maka mínimu, nune’e mós tanba iha Dili laran, liuliu liga ba situasaun Estadu Emerjénsia ne’e difkulta tebes tanba limitasaun ba sirkulasaun transporte sira, entaun difísil atu sira ba halo kobertura hodi halo programa sira,” nia dehan.

Rádiu Komunidade Comoro harii iha tinan-2015 no daudaun iha membru voluntáriu na’in-14 maka dedika-an hodi halo servisu iha rádiu ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here