Komandante UPF, João Belo dos Reis, Komandante UPF Kompañia Alfa Bobonaro, Inspetór Paulo Assis Belo ho membru-sira tun direita halo operasaun iha liña fronteira Nunura no Tunubibi, área Balibo no Batugade ni’an. Imajen/Eugénio Pereira

MALIANA, 05 juñu 2020 (TATOLI)-Segundu Komandante PNTL Munisípiu Bobonaro, Superintendenti João da Costa, informa situasaun siguransa durante implementasaun Estadu Emerjénsia faze dahuluk to’o inisíu faze datoluk nian kontinua la’o normal iha área fronteira terrestre entre Bobonaro ho Atambua Indonézia.

Situasaun hakmatek ne’e akontese tanba hetan seguransa másimu husi PNTL Komandu Bobonaro, Unidade Patrullamentu Fronteira (UPF), FALINTIL-Forsa Defesa Timor-Leste no mós kontribuisaun husi Autoridade lokál no komunidade.

Notísia Relevante :PNTL Bobonaro Esforsu Kombate Negósiu Ilegál

“Munisípiu Bobonaru mak baliza besik liu ho Indonézia maibé iha fronteira ne’e UPF ho F-FDTL sira hala’o seguransa iha liña fronteira ne’e rasik ho situasaun ne’ebé mak di’ak,” dehan Superintendente, João da Costa, iha Maliana, sesta ne’e.

Maski nune’e, UPF sei kontinua apreende sidadaun Timoroan no Indonézia ne’ebé maka hakat liña fronteira terrestre ho dalan ilegál durante implementasaun EE fulan-rua marsu to’o maiu.

Maibé nia la lembra total sidadaun hira maka Unidade Patrullamentu Fronteira prende durante ne’e.

Notísia Relevante :PNTL Bobonaro Rejista Kazu Rua De’it Durante EE

Atu evita transmisaun kazu COVID-19 foun mai Territóriu Timor-Leste maka sidadaun hotu hahú kedas sidadaun baibain, autoridade lokál, autoridade munisipál atu kolabora no informa ba parte seguransa bainhira identifika ema ultra pasa fronteira la tuir dalan legál.

“Liña fronteira ne’e  boot tebes entaun seguransa iha ne’e ita hotu nian tanba ne’e mak husu ba komunidade iha Munisípiu ida ne’e tenki kontribui no kolabora para se de’it mak tama mai iha ita-nia ra’in ita tenki hatene,” tenik tan.

Komandu PNTL Munisípiu Bobonaro iha membru efetivu hamutuk 154, membru ne’ebé konsentra iha Komandu hamutuk 60-resin, no restu destakadu ba Postu Polisia hitu hanesan, Balibo, Batugade, Atabae, Maliana, Cailaco, Bobonaro no Lolotoe.

Jornalista : Felicidade Ximenes

Editór        : Agapito dos Santos

HAKEREK NO HATÁN

Please enter your comment!
Please enter your name here